Šulerjam so bóle prezentować

pjatk, 09. septembera 2022 spisane wot:

Budyšin (SN). Prašenje „Kak dorost za serbske institucije zdobyć a poskitki serbskich dźěłowych městnow lěpje šěrić?“ stej wuběrkaj Zwjazkoweho předsydstwa Domowiny za nutřkownu demokratiju a serbsku ciwilnu towaršnosć resp. za zjawnostne a wukrajne dźěło na swojim wčerawšim wuradźowanju rozjimałoj, kaž Domowina informuje.

Damian Dyrlich jako předsyda wuběrka za nutřkownu demokratiju wopodstatni nastork za zetkanje, zo je dale a ćešo, dźěłowe městna w serbskich institucijach wobsadźić. Předsyda Domowiny Dawid Statnik skedźbni tež na potrjebu, wědomje w swójbach zbudźić, zo serbske institucije powabliwe powołanske perspektiwy skićeja. Konsens knježeše, zo měli so serbske institucije direktnišo šulerjam prezentować, kaž na powołanskich wikach Ralbičanskeje wyšeje šule abo na studijnym dnju Serbskeho gymnazija. Krystof Grofa, předsyda tamneho wuběrka, widźi jako hłownu zaměrowu skupinu něhdźe 25lětnych, kotřiž steja na proze powołanskeho žiwjenja. Image serbskich institucijow njeje tuchwilu přerěznje jara dobry, „naratiw“ ma so polěpšić.

Planuja Serbski filmowy dźeń

póndźela, 05. septembera 2022 spisane wot:

Budyšin (SN/at). Předsydstwo Domowinskeje župy „Jan Arnošt Smoler“ Budyšin přihotuje za nowember serbski filmowy dźeń w Budyskim kinje na Sukelnskej. Dopołdnjo měło w znamjenju serbskich trikowych filmow za dźěći a šulerjow stać. Serbske paski za cyłu swójbu su za popołdnjo wotmyslene a tajke za dorosćenych wječor. Budu to filmy z doby DEFY w NDR runje tak kaž tajke z filmoweho studija Sorabije pod nawodom dr. Tonija Bruka. Zajimcy móža so hižo nětko na wosebite filmowe chłóšćenki wjeselić.

Najprjedy pak hotuje so župa na swoju kóždolětnu kubłansku jězbu. Lětuša powjedźe 24. septembra po slědach Korle Awgusta Kocora do Zahorja, Ketlic a Stróže. Loni běchu po slědach Handrija Zejlerja po puću. Wobdźělnikow wočakuje w Ketlicach wodźenje po cyrkwi. Tam zaklinča pišćele a dr. Christian Kessner, awtor knihi „Swjate su mi twoje hona“, Domowinjanam přednošuje. Kaž přisłušna regionalna rěčnica Katja Liznarjec po posedźenju župneho předsydstwa minjeny štwórtk w Budyšinje zdźěli, móža so zajimcy hač do 16. septembra w Budyskim regionalnym běrowje přizjewić.

Přeja sej we wokrjesu serbski wuběrk

srjeda, 31. awgusta 2022 spisane wot:

Wojerecy (SN/at). Financowanje šćežki po serbskich slědach Wojerec „Via Sorabica Hoywoj“ chcedźa zastupjerjo župy „Handrij Zejler“ ze zamołwitymi města bórze rozjimać. To je župne předsydstwo na swojim wčerawšim posedźenju rozsudźiło. Do toho je Werner Sroka dalše wuslědki swojich rešeršow wo serbskim nakładniku a tehdomnišim předsydźe Wojerowskeho burskeho towarstwa Awgusće Lapštichu předstajił.

Nimo toho móža dalšeho sobustawa witać – předsydstwo je towarstwo „Šulska a domizniska stwa Ptačecy“ do župy přiwzało. Čłonojo towarstwa běchu próstwu wo přistup jednohłósnje zapodali, kaž kožupan Marcel Brauman zdźěli. Regionalna rěčnica Sonja Hrjehorjowa je hotowarniče regiona do zhromadneho dźěła za přiručku wo serbskej drasće zwołała.

Zhromadne mustwo přikład druhim

wutora, 30. awgusta 2022 spisane wot:

Koparjo a dalše wosoby z Delnjeje Łužicy su „Serbskemu mustwu“ přisłušeli, kotrež wudoby sej na lětušej Europeadźe třeće a z tym najlěpše městno při dotalnych štyrjoch europskich mišterstwach narodnych mjeńšin.

Dešno (HA/SN). To je wulke wudobyće za Serbow a cyłu Łužicu. Tale zhromadnosć mjez Hornjej a Delnjej Łužicu na serbskim polu je přikład za druhe wobłuki, wuzběhny předsyda Domowiny Dawid Statnik na hłownej zhromadźiznje towarstwa „Serbske koparje/Wendische Auswahl“ minjeny pjatk w Dešnje. Runje tak je so decernent z wokrjesneho zarjadnistwa Sprjewja-Nysa Michael Koch wobdźělnikam z Delnjeje Łužicy dźakował a podšmórnył, zo budźe wony wuspěch na přeco wažny podawk w tudyšej historiji.

Mocy wjazać

wutora, 30. awgusta 2022 spisane wot:
Wuslědk a zhladowanje na lětušu Europeadu w Korutanskej njemóžetej ze serbskeho wida lědma lěpšej być. Zamołwići a koparjo z Hornjeje a Delnjeje Łužicy su so zhrabali, su zhromadnje za jedyn postronk ćahnyli a tak spomóžny zakład za přichodne koparske europske mišterstwo narodnych mjeńšin wutworili. Čłowjek so dźiwa, dokal je sebjewědome wustupowanje Serbskich koparjow z Delnjeje Łužicy wjedło. Z tym su sej mjezsobne wobchadźenje na jednotnej runinje wuwojowali. Zo zahoritosć dale knježi, jeli so jej strowy optimizm do přichodneho zhromadneho postupowanja přidruži, je runje tak wažne wudobyće. Koparjo su dopokazali, zo wuska zhromadnosć na papjerje njesteji, ale zo wona w turněrje kaž Europeadźe z kóždej hru znowa demonstrowana wuspěšnemu wobdźělenju přewšo polěkuje. Přikładej ze sporta měli prawje bórze mnohe dalše wobłuki sćěhować. Mocy wjazać rěka sylniši być. Tele nastajenje trjebamy runje tak w strukturnej změnje. Axel Arlt

Chcedźa Serbski zakoń ponowić

srjeda, 24. awgusta 2022 spisane wot:

Budyšin (SN/at). Sakski Serbski zakoń z lěta 1999 ma so nowelěrować. K tomu chcedźa prezidij a prawniski wuběrk Zwjazkoweho předsydstwa Domowiny runje tak kaž Rada za serbske naležnosće Sakskeje swoje předstawy hač do spočatka decembra jako zakład k dalšej zaběrje z maćiznu předpołožić. Při tym dźe najprjedy wo naroki a zaměry, kotrež do moderneho zakonja słušeja, mjenje wo konkretne tekstowe formulacije. Potencielnej cilej móhłoj być runohódne zakótwjenje dwurěčnosće a přiměrjenje na europske mjeńšinowe prawo.

To bě ze zhromadneho hybridneho wuradźowanja prezidija a prawniskeho wuběrka Domowiny a sakskeje Serbskeje rady wčera w Budyskim Serbskim domje zhonić. Wulki dźěl wobdźělenych je so za modernizowanje zakonja wuprajił. Zdobom běchu pak tež kritiske hłosy, wobdźělnicy rozprawjachu. Z pokazku na njezjawny charakter zetkanja nochcyše so nichtó z nich nadrobnišo wuprajić.

Prěnje prócowanja wo nowelaciju sakskeho Serbskeho zakonja běchu 2014 te trójki zapósłancow Lěwicy, SPD a Zelenych w Sakskim krajnym sejmje.

Na kubłanskej wuprawje

štwórtk, 18. awgusta 2022 spisane wot:
Wot spočatka tydźenja přebywa delegacija towarstwa Hornjołužiske hola a haty – mjez nimi su tež zastupnicy Domowiny a Serbskeho instituta – na kubłanskej jězbje w Šwedskej. Tam wotryja sej sewjerošwedski leaderowy regiony Torne­dalen 2020. Kaž zdźěli regionalna rěčnica Domowiny za Kamjenski region Katharina ­Jurkowa, słuži wuprawa zeznaću kónčiny, w kotrejž wudobywaja železnu rudu ­a k zeznaću projektow, kotrež ze spěchowanjom Leader podpěruja. Zdobom wěnuja so aktiwnej wuměnje mjez tamnišimaj mjeńšinomaj Tornedalow a Samow. Dorozumić chcedźa so tež wo dalšim zhromadnym dźěle. Hižo w meji běchu zastupnicy ze sewjerošwedskeje kónčiny Łužicu wopytali. Foto: Katharina Jurkowa

Barowy festiwal přewjedli

póndźela, 15. awgusta 2022 spisane wot:

Prěni raz zarjadowachu w Radworskim klubje swjedźenski kónc tydźenja

Radwor (SN/pdź). Pod projektnym titulom „Zaso něšto lós w Radworju!!!“ wudoby sej tamniši młodźinski klub loni myto we wysokosći 5 000 eurow simulplus-fondsa „Čiń sobu“ w kategoriji žiwa dwurěčnosć. Z tutymi fenkami Radworska młodźina wulki són. Hižo jako woswjećichu 2018 swoju sobotnu party składnostnje 10lětneho wobstaća wonkowneje bary na łuce před młodźinskim klubom, zrodźichu mysličku zarjadować wulki barowy festiwal přez cyły kónc tydźenja. W zašłych třoch dnjach tutón dołhodobny projekt skónčnje zwoprawdźichu.

Za to Radworska młodźina hižo cyły tydźeń pilnje wšitko přihotowaše. Na łuce direktnje před baru natwarichu wulki stan z parketom-rejowanišćom a jewišćom. Dale klub wotnutřka přetwarichu, zo by słužił młodźinje zdźěla jako skład, wopytowarjam pak zdźěla tež jako druhi mały floor. Před wysokim žiwym płotom, kotryž klubowu łuku wot płoniny před Radworskim hrodom dźěli, nastajichu piwowy wóz a dalši mjeńši stan. Tež mnoho křesłow woni wonka zestajachu.

Hižo cyły tydźeń přihotuje Radworska młodźina swój klub za barowy festiwal. Wčera su na łuce před nim ­hłowny stan ­stajili, kotryž wonkownu baru samo čwak přesaha. Dźensa popołdnju chcedźa přidatnje hišće wjacore małe stany stajić. Pjatk wšak přeprošuja na serbski spěwny wječork, sobotu na reje z hudźbu wšelakich žanrow a njedźelu na rańše piwko, wobjed a swójbne popołdnjo, kotrež staršiska iniciatiwa Radwor sobu wuhotuje. Foto: Pětr Dźisławk

Ma žiłku za fotografowanje

srjeda, 03. awgusta 2022 spisane wot:
Po złoženju matury na Serbskim gymnaziju w Budyšinje poda so Darius Budar z Miłoćic na studij Geomatiki (kumštny wuraz za krajměrjerstwo a geo-informatiku) w Drježdźanach. W swojim wólnym času wěnuje so młody Serb wosebje fotografowanju. „Sym so hižo zahe z jednorej kameru wuspytował a tak je zajim za fotografowanje stajnje rostł. Jako sym sej potom prěnju špihelorefleksnu kameru přiswojił, rozestajach so intensiwnišo z tym, kotre wěcy měli so při fotografowanju wobkedźbować.“ Wšitke techniske a wuměłske zakłady bě sej 20lětny w běhu lět načitał abo z pomocu widejow nawuknył. Pozdźišo wopyta wón tež wšelake dźěłarnički. „Na fotografowanju wabi mje, zo nawuknješ z kameru wobchadźeć a z tym pozdźišo tež wobraz wobwliwować. Wjele wažniše pak je mi při fotografowanju móžnosć, swójski wid na situaciju abo wokomik zwobraznić. Nimo toho so kreatiwita njewobmjezuje, tak zo móžeš so sam zwoprawdźić a wokomik swobodnje interpretować. Foto ma móc zapopadnyć, štož so napisać njehodźi a to w cyle wěstym wokomiku.

Serbska debata

nowostki LND