Radwor (SN/pdź). Na starym dwórnišću mjez Radworjom a Čornym Hodlerjom knježeše w minjenymaj prózdninskimaj tydźenjomaj wulki hołk a tołk. Mjez 20 a 25 dźěći přichwata wšědnje tam, zo bychu wopytowali Radworski eksperiMINT-kampus. Radworska staršiska iniciatiwa jako nošer projekta zaruča w kooperaciji z dwórnišćom inkluzije kaž tež z podpěru Rafely Wićazoweje, rěčneje motiwatorki Domowiny, cyłodnjowske poskitki za holcy a hólcy wot 1. lětnika.

Płaćiwej rjadowani njezakonskej?

wutora, 15. awgusta 2023 spisane wot:

Spočatk julija běchu zastupjerjo Serbskeho sejma wo tym informowali, zo běchu mjezynarodnym prawiznikam specializowaneje Londonskeje kenclije nadawk dowěrili, juristiske kročele pruwować, kak móhli připóznawanje Serbow jako indigeny lud přesadźić. Mjeztym prěnja analyza předleži.

Budyšin (SN/at). Mjezynarodny konsorcij prawiznikow Doughty Street International (DSI) je prěnju analyzu móžnych prawniskich srědkow sejmarjow njewobkedźbowanja zasadnych mjeńšinowych prawow dla wudźěłał a 10. julija wozjewjał, kaž Serbski sejm wčera informowaše. Pomjenowane su tam bytostne žadanja, prawniske zakłady a puće jednanja. Runje tak su konkretne prawa za serbski lud a jeho demokratisce wuzwolene ludowe zastupnistwo wopisane.

Rezolucija za hódnoty EU w FUEN

pjatk, 11. awgusta 2023 spisane wot:

Loni běše přichilnosć prezidenta FUEN zwadnemu madźarskemu knježerstwu tema horceje diskusije – lětsa je kongres organizacije w Madźarskej. Kak Domowina ze situaciju wobchadźa?

Budyšin (SN/mb). Za kongres FUEN liča z dwěsćě delegatami a hosćimi. Čas přizjewjenja su lětnich prózdnin dla podlěšili. Na delegatnej zhromadźiznje maja naćiski za rezolucije rozjimać. Mjez namjetami je tež tekst pod titulom „Wu­znam prawnostatnosće za prawa mjeńšiny w Europskej uniji“, zapodaty wot dźewjeć čłonskich organizacijow. Prezidij FUEN je namjet jako material za disku­siju a wothłosowanje na zhromadźiznje 9. požnjenca w madźarskim wulkoměsće Pécs/Fünfkirchen/Pečuh přizwolił. Loni su naćisk rezolucije domoródnych narodnych mjeńšin Němskeje wo tajkej tematice z formalnych přičin wotpokazali.

Lětuše Krabatowe swjedźenske hry su pola mnohich Serbow regiona razne reakcije zbudźili – wot „dyrbimy rěčeć“ hač „tam ženje wjac njepojědu“. Inscenacija je tež čłonow župneho předsydstwa přesłapiła.

Wojerecy (SN/mb). Pod „wšelčiznami“ sej župne předsydstwo rady chwile za aktualne towaršnostne debaty bjerje – to běchu wčera wječor najprjedy lětuše Krabatowe swjedźenske hry w Čornym Chołmcu: Ći, kotřiž su spektakl dožiwili, kritizowachu zdźěla ordinarne, haj „seksistiske“ žwantorjenje na jewišću. Tež na inscenowanym, stawiznam njewotpowědowacym konflikće mjez Delnimi a Hornimi Serbami su so serbscy přihladowarjo postorkowali. Runje tak na njedostojnym wobchadźenju z našej hymnu.

Dalša tema: „Smědźa“ holcy dźěle narodneje drasty za modiski outfit wužiwać? Diskutanća su so přewažnje wuprajili, zo je lěpje, elementy našeho regionalneho fundusa brać hač na přikład bayerski dirndl we Łužicy. Zdobom słušeja wězo do serbskich nałožkow a wobrjadow narodne drasty po tradiciji, štož dotal tež nichtó do prašenja stajił njeje.

Wuprawa do wuchodneje Belgiskeje

srjeda, 09. awgusta 2023 spisane wot:

W septembrje 2008 bě prěni raz po 1989/1990 skupina Serbow na iniciatiwu tehdyšeho předsydy DGB Sakskeje Hanja Lucassena we wuchodnej Belgiskej pobyła. Nětko chce so Serbski sejm tam wobhonić wo spomóžnym samozarjadnistwje němskeje mjeńšiny.

Njebjelčicy (SN/at). Serbski sejm hotuje so na štyridnjowsku wuprawu wot 28. septembra hač do 1. oktobra do wuchodneje Belgiskeje. Předwidźanej stej zetkani z ministerskim prezidentom Němskorěčneje zhromadnosće Oliverom Paaschom a z jeho knježerstwom w Eupenje. Dale wopytaja tam Wuchodobelgiski parlament a Europski parlament w Brüsselu. Wo tym informuje Serbski sejm, ­kotryž bě jeho mjezynarodny partner, Załožba Slavonic Europe, přeprosył. ­Ekskursiju přewjedu we wobłuku programa hranicy překročaceho zhromadneho dźěła Lusatia Glow. Woni rěča wo „politiskej misiji serbskeho parlamenta, zo bychu europske modele demokratiskeho samozarjadnistwa we wobłuku kubłanskeje a kul­turneje awtonomije zeznawali“.

Próstwy za klětu

štwórtk, 03. awgusta 2023 spisane wot:
Budyšin (SN). Załožbowy zarjad je in­formował, zo je so hač do póndźele 45 próstwow wo spěchowanje za klětu zapodało. Mjez próstwustajerjemi su štyrjo z wobłuka nowych medijow. Z wjacorymi próstwami prócuja so ludźo wo podpěru za wjetše zarjadowanje. To je na přikład Jolka w Nuknicy we wulkim róžku, jutrowny seminar MENS w Budyšinje w nalětniku, jubilej 75. róčnicy załoženja 1. serbskeje kulturneje brigady w róžowniku abo smažniku a wězo přihoty a wobdźělenje Serbskeho mustwa na Europeadźe w pražniku. Cyłkownje su próstwarjo, tak wuchadźa z zdźělenki Hanki Budarjoweje, wo wjac hač dwaj milionaj eurow prosyli, štož „pak njerěka, zo budźe załožbowy zarjad wšitke próstwy přizwolić móc.“ Tři próstwy su přepozdźe dóšli. Dotal zapodate próstwy maja přewažnje spěchowanski wolumen nad dźesać tysac eurami. Próstwy za projekty prěnjeho połlěta 2024 ze spěchowanskej sumu pod dźesać tysac móžeće hač do 30. požnjenca zapodać. W ramiku srědkow za změnu strukturow w Sakskej su nimo běžnych projektow tři nowe próstwy dóšli.

Karolina a Kryštof wuspěšnaj byłoj

wutora, 25. julija 2023 spisane wot:

Karolina Babczuk a Kryštof Peršín staj zašły tydźeń w Budyskim Serbskim domje wo swojim slědźenju přednošowałoj. Wot lońšeje nazymy studowaštaj ze stipendijom Załožby za serbski lud w Lipsku.

Budyšin (SN). Karolina, studentka bohemistiki z Pólskeje, předstaji swój projekt „Analyza hornjoserbskich rostlinskich mjenow w Smolerjowych ,Pěsničkach hornich a delnich Łužiskich Serbow‘“. Krystof, doktorand z Čěskeje, rěčeše wo přełožkach ruskeje literatury do hornjoserbšćiny w časopisu „Serbowka“, kiž wudawachu studenća srjedź 19. lětstotka w Serbskim seminarje w Praze. Potom złožištaj hišće swoje rěčne pruwowanje w hornjoserbšćinje (na schodźenku B2 resp. C1). Karolina wróći so do Pólskeje, zo by tam ze swojim studijom pokročowała. Kryštof wostanje we Łužicy, pisa swoje doktorske dźěło a dźěła podźělnje w Rěčnym centrumje Witaj a w Serbskim instituće. Nimo toho słuša do kruha awtorow noweje kolumny „Z čěskim wóčkom“ našeho wječornika.

Feliks Ričel nowy referent Domowiny

štwórtk, 13. julija 2023 spisane wot:

Zjawne posedźenje Zwjazkoweho předsydstwa Domowiny traješe wčera wječor jenož dobru hodźinku, ale móžeše najebać to wšelake konkretne wuslědki prezentować.

Wojerecy (SN/mb). Na spočatku je předsyda Domowiny Dawid Statnik jako wuslědk njezjawneho dźěla wuradźowanja dobre poselstwo wozjewił: Po wjac hač jednym lěće pytanja za nowym referentom za komunalne, gremijowe a ministerialne naležnosće su tute dźěłowe městno zaso wobsadźili. Wot 1. oktobra budźe Feliks Ričel, pochadźacy z Njebjelčic, tuchwilu projektny manager Serbskeho instituta a předsyda wuběrka zwjazkoweho předsydstwa za kulturu a wuměłstwo, tute zastojnstwo w Choćebuzu wukonjeć.

Přichodna hłowna a wólbna zhromadźizna třěšneho zwjazka so 5. jutrownika 2025 na teritoriju župy „Jan Arnošt Smoler“ Budyšin wotměje. To je na posedźenju dwanaće w sydarni přitomnych a šěsć online přišaltowanych čłonow gremija runje tak wobzamkło kaž wólbny porjad a zestawu wólbneho wuběrka za wólby 4. naměstnika ze Sakskeje za załožbowu radu, kotrež maja prawniskich wušparanjow dla nachwatać (SN su rozprawjeli).

Štó čini što?

štwórtk, 13. julija 2023 spisane wot:
Wěsće wy, kotre nadawki ma referent za komunalne, gremijowe a ministerialne naležnosće? To je dźěło, kotrež ma nowy referent Domowiny w Choćebuskim běrowje wukonjeć. Županka župy „Michał Hórnik“ Diana Wowčerjowa je na wčerawšim posedźenju zwjazkoweho předsydstwa zajimawu temu načała: Kotru rólu hraje w serbskim žiwjenju štó, a što wě zjawnosć wo tym? Smy pozdatnje w dobje absolutneje transparency, kóždy dźeń smy z nawalom wobrazow konfrontowani, na kotrychž su ludźo widźeć, kotřiž maja wažny termin z wažnymi druhimi ludźimi. Štož pak za tym wšěm tči, kotry zmysł to ma, hustodosć hižo njewěmy. Tohodla tule započinamy: Zastupjerjo Domowiny skutkuja w ducentach regionalnych gremijach a maja kontakty na wšěch politiskich runinach pěstować. To ma nětko Feliks Ričel koordinować a přewodźeć. Hladajo na jeho nazhonjenja mjez druhim w Mjeńšinowym sekretariaće dobry rozsud. Marcel Brauman

Strukturnu změnu wobjednawali

póndźela, 03. julija 2023 spisane wot:
Wužadanja a šansy změny strukturow we Łužicy běchu tema fachoweje ekskursije towarstwa za nałožowanu geografiju w Münsteru minjeny pjatk w Budyšinje. W Serbskim domje je etnologa dr. Fabian Jacobs ze Serbskeho instituta zhromadnje z referentom Domowiny Pětrom Brězanom (4. a 3. wotprawa) wšelake UNESCO-iniciatiwy a projekty serbskeho kulturneho turizma w regionje předstajił. W towar­stwje angažuja so geografki a geografojo, architektki a architekća we wobłukach regionalne wuwiće, měšćanske planowanje a turistiske poradźowanje. Po přednošku wopytachu mjez druhim tež Serbski muzej. Foto: Domowina/Božena Šimanec

Serbska debata

nowostki LND