Valtice/Riga (dpa/SN). We wjacorych čłonskich statach Europskeje unije so dźeń a bóle planowanemu rozdźělowanju ćěkancow po wšej Europje spjećuja. Nimo Čěskeje a Słowakskeje wotpokazuja předewšěm baltiske staty planowany kwotowy system, z kotrymž chcedźa južnoeuropskim krajam hladajo na hobersku ličbu ćěkancow tam pomhać. Wotpowědne plany chcychu dźensa w Brüsselu předstajić.

„Jednotliwe knježerstwa wědźa same najlěpje, što móža we wobłuku zhromadneje solidarity zdokonjeć“, rjekny čěski ministerski prezident Bohuslav Sobotka wčera po zetkanju ze swojim słowakskim kolegu Robertom Ficom we Valticach. Sobotka w tym zwisku komisiji EU wumjetowaše, zo z najnowšimi namjetami za kwotowy system debatu wo ćěkancach „njetrjebawšo“ pospěša. „To debaće wo migraciji w Europje skerje škodźi hač pomha.“ Čěske knježerstwo bě dobrowólnje připrajiło, 70 ćěkancow ze Syriskeje přiwzać. Kraj bě naposledk hižo tójšto ćěkancam z Ukrainy wućek skićił. „Nic jeno w juhu Europy je połoženje ćežke, tež na wuchodźe“, Sobotka zwurazni.