Chrósćicy (SN/CoR). Jutře je skónčnje tak daloko, a XI. mjezynarodny folklorny festiwal „Łužica 2015“ so z pisanym ćahom ansamblow po Budyšinje započnje. Zawěsće su kulturne skupiny z cyłeho swěta derje na program, kotryž chcedźa Łužičanam předstajić, přihotowani. Runja jim a folklornym wuměłcam našich domjacych ćělesow pak su tež dźěći za wulki podawk zwučowali. Wšako maja wone tohorunja krute městno w kole štyridnjowskeho programa. Štož zamóža, chcedźa dźěći sobotu w 15.30 hodź. na Krawčikec dworje pokazać.
Hladajo na ličbu wobdźělacych so njeje runjewon mało dorosta: Wosom cyłkow z dohromady něhdźe 200 dźěćimi so prezentuje. Su to dorostowa Serbska rejwanska skupina Smjerdźaca, Serbske dźěćace towarstwo Ćisk, Łužičanka ze Serbskeho ludoweho ansambla kaž tež šulerki a šulerjo ze zakładnych šulow Worklecy, Ralbicy, Pančicy-Kukow a Chrósćicy. Dale je so měšana skupina šulerjow 5./6. lětnika dwójce na dźěłarničce zetkała, zo bychu mały program na afriskich bubonach zestajeli.
