Sobotu startowaše tež krajny koparski ligist Jednota Kamjenc do noweje­ sezony. Pola postupnika z Taucha docpě tón hižo w 12. min. nawjedowanje přez Ondřeja Novotneho. Krótko do połčasa přijimachu hosćo po róžku 1:1, štož bě zdobom kónčny wuslědk. Z dypkom trenar Jednoty Frank Ričel wězo spokojom njebě, kritizujo wosebje wužiwanje šansow. Do hry bě so Hanspeter Benad z Ričlom zetkał, je z nim minjenu sezonu wuhódnoćił a so tež za zaměrami noweje hrajneje doby prašał.

Knježe Ričlo, minjenu hrajnu wobsadźi Jednota Kamjenc 10. městno w tabulce krajneje ligi. Sće z tym spokojom?

F. Ričel: Naš cil bě jednocyfrowe městno, štož njejsmy docpěli. Mjez druhim su nam dypki wotćahnyli. Ale mějachmy tež mnohich zranjenych hrajerjow (Wochnik, Cyž, Nulíček, Schiring), a tohodla smy w sezonje tež swój rytmus zhubili. Z dobrym kónčnym spurtom pak smy sej klasu zawěsćili a tak běch z mustwom samo na sebi w kóždym wokomiku dosć spokojom.