2. dźeń Hornjeje Łužicy lětsa 21. awgusta

Budyšin (SN/CoR). Po lońšej premjerje wotměje so tež lětsa zaso Dźeń Hornjeje Łužicy 21. awgusta. Něhdźe sto najwšelakorišich zarjadowanjow wabi w času wot 14. do 30. awgusta. Paleta saha wot wjesneho domizniskeho a muzejoweho swjedźenja přez čitanja, wodźenja a pućowanja pěši abo z kolesom hač k hudźbnym, spěwnym a dialektnym zarjadowanjam. Typiske hornjołužiske jědźe kaž „Teichelmauke“ budu wězo tež w poskitku, samo winarnja Radomierzyce na pólskej stronje Hornjeje Łužicy na tu abo tamnu specialitu regiona přeproša. Mnohe towarstwa, gmejny, cyrkwje a kulturne institucije budu zaso pódla. Centralny swjedźeń so njewotměje, za to pak wšudźe něšto poskićeja – wot Habrachćic-Neugersdorfa do Wojerec, wot Běłeje Wody a Mužakowa hač do Kinsporka.