Bonn (SN/CoR). Bonnske wuměłstwowe towarstwo projekt „11.08.2015“ turkowskeje wuměłče Banu Cennetoğlu tučasnje organizatorisce podpěruje. Zaměr je wšitke nacionalne, regionalne a lokalne nowiny, kotrež dźensa wuchadźeja, zhromadźić. Něhdźe 800 ludźi a 300 nakładnistwow so na projekće wobdźěla, mjez druhim tež Ludowe nakładnistwo Domowina. Eksemplary wšitkich nowin alfabetisce rjaduja a je do čornych wobalkow wjazaja. Material wotbłyšćuje wokomik němskeje towaršnosće w powěsćach jednoho dnja. Wopytowarjo planowaneje wustajeńcy w Bonnskim wuměłstwowym towarstwje móža sej potom wobraz tajkeho wokomika tworić.