Němska, Francoska a Italska pominaja wjetšu solidarnosć
Budapest/Brüssel/New York (dpa/SN/K). Po dwaj dnjej trajacej blokadźe Budapestskeho wuchodneho dwórnišća je so madźarska policija dźensa rano wróćo sćahnyła, na čož su sta ćěkancow nastupišća wobsadźili a do tam stejacych ćahow zalězli. Dopołdnja wotjědźe prěni ćah do směra na Awstrisku, hdźež chcedźa ćěkancow w lěhwach zaměstnić.
Konserwatiwny ministerski prezident Viktor Orbán je dźiwajo na njesměrny nawal ćěkancow do jeho kraja dźensa w Brüsselu nuznje wo pomoc prosył. W jednanjach z prezidentom komisije EU Jeanom-Claudeom Junckerom a předsydu Europskeho parlamenta Martinom Schulzom rozjimowaše wón móžne naprawy, kak krizu zmištrować. Zo móhła Madźarska přichadźacych migrantow nachwilnje zastarać, trjeba wona nuznje wosom milionow eurow podpěry.