Wjele wjace šansow měli

Montag, 14. September 2015
Artikel bewerten
(0 Stimmen)
Bosćij Bejma (naprawo), kiž dyrbješe minjeny raz žołto-čerwjeneje karty dla wuwostajić, bě wčera zaso pódla a postara so wo wjacore strašne nadběhi Sokoła Ralbicy/Hórki .  Foto: Jurij Bjeńš Bosćij Bejma (naprawo), kiž dyrbješe minjeny raz žołto-čerwjeneje karty dla wuwostajić, bě wčera zaso pódla a postara so wo wjacore strašne nadběhi Sokoła Ralbicy/Hórki . Foto: Jurij Bjeńš

FSV Łuty – Sokoł Ralbicy/Hórki 0:4 (0:2)

Zestawa hosći: Gloxyn – Kř. Matka, B. Bjeńš, von Köding, Lulak, St. Bjeńš, Korjeńk­ (80. Wałda), T. Bejma (65. M. Matka), Nuk, Domaška, B. Bejma

Wjesele, ale tež z hłowu wijo su so koparjo Sokoła Ralbicy/Hórki wčera we Łutach­ z horstku delanskich fanow rozžohnowali. Su drje ze 4:0 jasnje dobyli, njewužiwanych šansow dla so pak njesměrnje mjerzachu.

Porno tydźenjej do toho staj Bosćij Bejma a Bosćij Bjeńš zaso sobu hrałoj, štož bě za wěstotu w škiće kaž tež za natwar­ jara wažne. Přez cyłe 90 mjeńšin hosćo dominowachu a wuhrachu sej jara dobre składnosće. W prěnim połčasu wšak spytachu Łutowčenjo swojich spěšnych nadběhowarjow z dołhimi třělwami posłužować a sej tak šansy nadźěłać. Hdys a hdys so to tež poradźi, přetož wonkowni škitarjo Sokoła w tym abo tamnym dwuboju podležachu. Jako suny Stefan Bjeńš po flance Bosćija Bejmy bul k nawjedowanju do wrotow (16.), pak wukon domjacych popušći. Jeno zrědka so woni hišće před wrotami Chrystofa Gloxyna pokazachu. Wo 2:0 w 33. min. postara so Fabian Korjeńk. Preciznu flanku Tomaša Bejmy zhłójčkowa wón do hornjeho dołheho kuta. A Sokoljo móhli hišće do połčasa dalše wrota docpěć – stajnje pak bě jim noha přećiwnika na puću.

Po přestawce wšak so hra spěšnje rozsudźi. Pětr Domaška bu sam na wrota běžo powaleny a dósta jědnatku! Korjeńk ju wěsće k 3:0 (47.) přetwori. Mocy domjacych­ popušćowachu, Ralbičanski koparski trenar Thomas Schultz pak žadaše­ sej wot swojich chowancow, zo temp­o dale dźerža. Přez dwójne pasy, dołhe třělwy a dobre indiwiduelne akcije stejachu Sokoljo nětko časćišo sami před wrotami přećiwnika. Samo přihlado­warjo z Łutow jim aplawděrowachu. Hnydom na to wšak so wótře smějachu, dokelž Sokoljo mnohe składnosće jara lochkomyslnje njewužiwachu. Jednu z tajkich pak přetwori tola hišće Michał Matka, kiž suny bul do klětki ke kónč­nemu 4:0 (85.). Tež hóstny wrotar Gloxyn­ dopokaza po hłójčce Łutowskeho nadběhowarja z wulkotnym refleksom, zo bě přez cyłu hru połnje koncen­trowany.

Što ma so hišće rjec? We Łutach dyrbjachu­ sej hrajerjo a fanojo Sokoła w minjenych lětach tójšto antiserbskich parolow a komentarow domjacych přihladowarj­ow naposkać. Lětsa pak bě jich­ jara mało a atmosfera dawno nic tak z hidu napjelnjena kaž w zašłosći. Chwalbu tuž do Łutow!

Veröffentlicht in Sport
Bitte anmelden, um einen Kommentar zu posten

Anzeige