Kamjenc (aha/SN). Do swjedźenskeho tydźenja składnostnje 450. róčnicy wobstaća cyrkwje swj. Hany stej tamnišej stawizniske towarstwo a cyrkwinsko-twarske towarstwo zapřijałoj přednošk serbskeho superintendenta Jana­ Malinka. Minjeny pjatk přednošowaše wón w Kamjenskej Haninej cyrkwi wo skutkowanju ewangelskich Serbow w Lessingowym měsće. Mjez 60 zajimcami běchu tež wjacori Serbja.

„Witam was wutrobnje na přednošk ze zajimawym pozadkom. Hač do lěta 1928 běchu tu serbske kemše swjećili“, zahaji Malink serbsce swój přednošk, kotryž swědčeše wo intensiwnym slědźenju a zaběrje z archiwnym materialom. Wobswětlejo čas do reformacije, tehdy bě pjećina wobydlerjow Kamjenca hišće serbska, pokaza Malink na wuslědk reformacije, kotraž měješe 1527 w Kamjencu swoje spočatki. Po tym zo bě 1536 posledni Kamjenski katolski duchowny zemrěł, załožichu tam před 450 lětami, 1565 serbsku ewangelsku wosadu. Do njeje słušachu hišće 1691 tehdy nimale ryzy serbske wsy kaž Njedźichow, Běła, Jěžow, Bambruch a Křidoł.