Pólski rězbar wustaja
Budyšin. Rězbar, basnik a hudźbnik Ryszard Zając z Jelenjeje Góry předstaji swoje wuměłske rězbarjenje we wustajeńcy, kotruž wotewru jutře, 14. oktobra, we 18 hodź. w Budyskej Serbskej kulturnej informaciji. Wšitcy zajimcy su wutrobnje přeprošeni. Zając je mjez druhim znatu drjewjanu cyrkej Wang w Karpaczu ponowił. Hakle spočatk septembra bě wón ze swojimi wudźěłkami na Ralbičanskim wjesnym swjedźenju babylěću zastupjeny.
Za nanow z dźěćimi
Smochćicy. „Z papu pokład pytać“ rěka hesło kónca tydźenja za nanow a jich dźěći, kotryž přewjedu wot 20. do 22. nowembra w Smochčanskim Domje biskopa Bena. Tam chcedźa zhromadnje pokłady žiwjenja pytać; ale tež wopyt praweje pokładownje steji na programje. Dale su planowane kreatiwne zaběry a chwile za hry, kotrež wjele wjesela wobradźeja. Kónc tydźenja nawjedować budźe referent domu Ansgar Hoffmann. Zajimcy njech přizjewja so pod telefonowym čisłom 035935/ 22 317.
Přewjedźetaj rěčnu hodźinu