Drježdźany (dpa/SN/K). Na demonstraciji Pegidy wčera wječor w sakskej stolicy je so nimale 10 000 ludźi wobdźěliło. Jako rěčnica wustupi něhdyša politikarka strony AfD Tatjana Festerling. Ta měješe namjet paratny, z wotšćěpjenjom Sakskeje wot zwjazkoweje republiki a Europskeje unije wutworić „Säxit“. Za jubilejnu manifestaciju přichodnu póndźelu připowědźi šef antiislamistiskeho hibanja Lutz Bachmann mnohich hóstnych rěčnikow z druhich krajow EU.
Po informacijach policije njeje za čas zarjadowanja k žanym kaženjam dochadźało. Juristiske sćěhi su přiwšěm móžne. To tohodla, dokelž pokazowaše jedyn z přiwisnikow Pegidy šibjeńcu, přihotowanu za kanclerku Angelu Merkel (CDU) a jeje naměstnika, hospodarskeho ministra Sigmara Gabriela (SPD). Statne rěčnistwo rozsudźi dźensa wo chłostanskoprawniskej relewancy. Bachmann zwjazkowemu knježerstwu wumjetowaše, zo wjedźe ze swojej politiku napřećo ćěkancam kraj do wobydlerskeje wójny.