Zwjazkowy sejm azylowy paket schwalił
Berlin (dpa/SN/K). Zwjazkowy sejm je na swojim dźensnišim schadźowanju přiwótřenje prawa na azyl schwalił. Wjetšina zapósłancow čorno-čerwjeneje koalicije azylowemu paketej přihłosowaše. Z nim je mjez druhim předwidźane, zo wostanu ćěkancy hač do šěsć měsacow w prěnich přijimarnjach. W tym času maja so jich próstwy po móžnosći wobstarać. Albanska, Kosowo a Montenegro su zastopnjowane jako wěste pochadne kraje. Jutře wothłosuje Zwjazkowa rada wo reformje azyloweho prawa. Zakoń ma hižo 1. nowembra płaćiwosće nabyć.
Kanclerka Angela Merkel (CDU) bě w swojim knježerstwowym wozjewjenju naležnje za schwalenje azyloweho paketa wabiła. Wšo druhe njeje žana opcija, dokelž njeje swójbam tak pomhane. Kanclerka ma za to, zo „čakaja na kraj wulke napinanja“. Azylowy paket sam njezamóže pak problemy přewinyć. Wuběrne rozrisanje je jeničce na mjezynarodnej runinje móžne. Za to chce so wona zasadźeć, Merkel přilubi. Wójna w Syriskej je po jeje słowach hłowna přičina migrantskeje krizy.