ST Ćisk II

– Sokoł Ralbicy/Hórki II 1:3 (0:1)

Zestawa hosći: Cyž – Bogusz, Zynda, Róbl, Bejmak, Kobalc, Kř. Matka, Serbin, M. Matka, Kurjat (64. Bernard), Šmit

Ćišćanska koparska rezerwa steji lětsa tež w pincy tabulki a je zdobom direktny susod­ Sokoła Ralbicy/Hórki II. Wona wuži­ swobodny hrajny dźeń prěnjeho mustwa a zesylni so ze štyrjomi jeho hrajerjemi. Mjez nimi bě wrotowy garant Rostam Geso. Tež mustwo Sokoła běše derje nastajene. Z Křesćanom Bejmakom, Křesćanom a Michałom Matku běchu to tónraz třo z nazhonjenjom we wokrjesnej wyšej lize.

Hra so derje započa. W 11. min. přesadźi so spěšny Michał Matka na lěwej stronje. Tam nahra Róbla, kiž preciznje dosrjedźa sflankowa, a Šmit direktnje přetwori. Tež přećiwnik pak běše přeco zaso strašny, a to wosebje z dołhimi třělwami k spěšnym nadběhowarjam. Tomu polěkowaše, zo stejachu Ralbičenjo tróšku přewysoko. Tak wuskoči wjele róžkow, a tuž so w šěsnatce stajnje paleše. Dwě dobrej móžnosći Bejmak­ njewuži. Dwójce so přesadźi, před wrotami pak zaprajichu jemu čuwy. Krótko do połčasa posłuži Michał Matka ze zakładneje linije Šmita, tola tež wón njetrjechi.