Swjedźenski tydźeń k znowawotewrjenju Budyskeje tachantskeje cyrkwje po dwulětnym wobšěrnym ponowjenju
Na lěsycy mjez katolskim a ewangelskim dźělom móžeš serbske a němske hrónčko ze Swjateho pisma čitać.Přemóžace začuće će wobdawa, hdyž do Budyskeje cyrkwje swjateho Pětra zastupiš. Hižo ryzy wulkosć Božeho domu je přemóžaca, předewšěm jeje swětły błyšć će runjewon wobkuzłuje. Lědma što dopomina hišće na twarnišćo, štož tachantska cyrkej minjenej lěće bě. Jako w tychle historiskich murjach posledni raz přebywach, wotměchu tam runje dźeń wotewrjeneho twarnišća: Ławki běchu wurumowane, wołtarje zapowěsnjene, w kóždym róžku stejachu twarske lampy a wonka čakachu takrjec hižo róštytwarcy, kotřiž něšto dnjow pozdźišo cyrkej nutřka hač pod wjerch zaróštowachu.