Delnjoserbski rozhłós RBB je w Slepjanskim Serbskim kulturnym centrumje swój nětko hižo 11. njedźelny koncert přewjedł. Dokelž bě to runje prěni adwent, stejachu přewažnje dohodowne pěsnje na programje.
29. nowember běchu sej mnozy z błótowskeje wokoliny, z Choćebuskich kónčin, z holanskich wsow wokoło Slepoho runje tak kaž lubowarjo serbskeho spěwa z Radworja, Chrósćic a Komorowa pola Rakec do kalendra zapisali. „Smy w delnjoserbskim rozhłosu sćelaka RBB wabjenje za 11. njedźelny koncert w Slepom słyšeli, a tak chcychmy jón sobu dožiwić“, zwurazni Radworčan Bosćij Handrik, kiž bě z mandźelskej a dalšej swójbu na zarjadowanje přijěł. To, štož móžeše wón hromadźe ze 150 hosćimi w běhu něhdźe dweju hodźin na wupyšenej žurli SKC dožiwić, bě přewšo wotměnjawy a spodobny dohodowny program z cunimi, zdźěla pak tež tróšku wótrišimi zynkami.
