Mnichow (dpa/SN/K). Ruska a USA wu-tworja dźensa dźěłowu skupinu, kiž ma přihotować za Syrisku přiměr. Diplomaća a zastupnicy wójska wobeju stron zetkaja so w běhu dnja w Genfje prěni raz a budu so potom prawidłownje schadźować. Tole zdźěli ruski wonkowny minister Sergej Lawrow po nócnym jednanju Syriskeje dla.

Ruska, USA a wažne staty regiona kaž Turkowska a Sawdi-Arabska běchu so po wjele hodźiny trajacych zasakłych rozmołwach w Mnichowje na to dojednali, zo maja brónje w Syriskej womjelknyć. Islamistiske milicy Islamski stat (IS) a Fronta Al-Nusra smědźa pak dale wojować. K tomu Lawrow rjekny, zo budźe ruske lětarstwo tež po postajenju přiměra pokročować z nalětami na pozicije tejelu teroristiskeju organizacijow. Zapad Ruskej wumjetuje, zo z nalětami mori tež opozicionelnych bojownikow.