W krajnym finalu wubědźowanja „Młodźina trenuje za olympiju“ su sej holcy 8. a 9. lětnika w starobnej skupinje III mjez šěsć startowacymi mustwami slěbro zawěsćili. W kónčnej partiji podležachu wone po wulkim boju 0:2 gymnaziastkam z Lichtensteina a su nětko třeće mustwo Serbskeho gymnazija Budyšin (SGB), kotrež je titul sakskeho wicemištra šulow našeho kraja dobyło.

Kajki to grandiozny wuspěch volleyballistkow SGB w Dippoldiswaldźe. Po dobyću bronzy w aprylu 2014 docpěchu hrajerki wokoło kapitanki Luizy Šubertec nětko finale sakskeho wurisanja. Sydom holcow bě so wot spočatka šulskeho lěta na pjatkownišej AG na wjeršk přihotowało. A rezultat pokaza, zo je so kóžda přidatna kapka potu na treningu wudaniła. Započało bě so krajne finale z předkołami. Tam hraješe kóždy přećiwo kóždemu dwě dobyćerskej sadźbje, a to w dwěmaj staflomaj. Hrajnišćo je tróšku mjeńše (7x7 metrow), a na polomaj stajnje štyri hrajerki wo dypki wojuja.