„Zymny kut“ rěka nowa serbska zběrka basnjow Kita Lorenca, kotraž je dypkownje k wčerawšej knižnej premjerje w Ludowym nakładnistwje Domowina wušła. Wjace hač 30 zajimcow je do Budyskeje Smolerjec kniharnje přišło, zo bychu dožiwili čitanje 78lětneho mištra rěčow, kotremuž nazymu Myto Christiana Wagnera spožča.

Budyšin (SN/CoR). „Z Kitom Lorencom zhromadnje dźěłać bě mi wulka česć. Běch wšak spočatnje rozbudźeny – stary zajac a młoda juška, što móhł lektor tajkemu nazhonitemu awtorej radźić? Mam so jemu dźakować, zo smědźach jemu poboku stać“, rozłoži lektor Pětr Thiemann wčera wječor. A wuslědk jeju zhromadneho dźěła móže so widźeć dać. Dohromady 84 w minjenymaj lětomaj nastatych twórbow z pjera basnika a jako dodawk něšto romantiskeje čěskeje poezije Kyrkonošow w jeho přełožku nowa kniha wobsahuje. Jeje wobalku je Iris Brankačkowa z čornoběłej grafiku porjeńšiła.