Hižo loni bě serbski wječor pod hesłom „Sagenhaftes aus der Lausitz“ we wobłuku Wojerowskich hudźbnych dnjow wuspěšny, a tež pokročowanje wčera na tamnišim hrodźe pokaza, zo so nowy koncept organizatorki Carmen Hoffmann wudani.

Wojerecy (DGe/SN). Zwjetša serbsku a čěsku hudźbu, zwjazanu z łužiskimi powěsćemi, su tak derje zestajeli, zo móžeše připosłuchar swójski wosobinski poćah k tomu wuwić. Wiolonistka Annette Thieme a pianistka Christine Hesse hudźeštej tak intensiwnje a perfektnje na wysokim wuměłskim niwowje, zo dožiwi publikum wosebitosće jednolitiwych komponistow. Wo tym swědčeše hižo prěni ekscelentnje interpretowany kruch wječora, „Słowjanska reja“ čo. 6 Antonína Dvořáka. Bě to wohnjostroj temperamenta. Swědomiće su hudźbu k wot Ines Hommann přednjesenym powěsćam wubrali. Tak hodźi so Jana Pawoła Nagelowa „Bórkowska“ z jeho serbskich rejow derje k podawkam wo hadźacym kralu runje tak kaž „Łazowska“ k powěsći wo młodym poriku, kotryž hakle po wokołopuću zbožo nadeńdźe. Zo je hudźba Nagela přeco něšto wosebite, to zamó duwo hosćom zbližić.