Cyłkownje wosom mustwow bě sej wčera popołdnju na tradicionalny koparski turněr do Pěskec dojěło. Hrajny modus běše podobny kaž minjene lěta. Hrali su w dwěmaj staflomaj, najlěpše mustwo skupiny A nastupi po předkole w finalu přećiwo prěnjemu ze skupiny B. Wjedrowe wuhlady drje njeběchu wčera najlěpše. „Typiske aprylske“, bě najčasćišo słyšeć. Hdys a hdys so tak w stadionje „K dźiwjemu swinjeću“ kapotaše, na to so zaso słónco pokaza. Prjed hač prěnju hru zahwizdachu, spominachu koparjo na zemrěteho Pěskečanskeho koparja a wjesnjana Alfonsa Mjechelu.