Na wopyće w Spálenym Poříčí byli

Mittwoch, 06. Juli 2016
Artikel bewerten
(0 Stimmen)
Čłonojo sportoweju towarstwow Sokol Spálené Poříčí a Sokoł Ralbicy/Hórki pobychu we wobłuku 51. sportoweje wuměny mjez druhim w 1 400 metrow hłubokim šachće, kotryž je jedyn z najhłubšich w srjedźnej Europje.  Foto: Maik Brězan Čłonojo sportoweju towarstwow Sokol Spálené Poříčí a Sokoł Ralbicy/Hórki pobychu we wobłuku 51. sportoweje wuměny mjez druhim w 1 400 metrow hłubokim šachće, kotryž je jedyn z najhłubšich w srjedźnej Europje. Foto: Maik Brězan

Hižo 51. raz su so łužiscy a čěscy sportowcy mjezsobnje wopytali. Tónkróć nastaji so poměrnje mała skupina z Delan na jězbu do Spá­leného Poříčí blisko Plzenja. Termin so z europeadu prěkowaše, a druhe koparske mustwo Sokoła Ralbicy/Hórki mě­ješe poslednju winowatostnu hru se­zony.

Sobotu rano podachu so wuprawnicy do hórniskeho muzeja Březové Hory, hdźež wobhladachu sej podkopki z mjenom Hanna. Jedna skupina poda so z liftom do hłubiny, tamna jědźeše z podzemskim ćahom do ćmy. Překop z lěta 1832 je z něhdźe 1 400 metrami jedyn z najhłubšich šachtow srjedźneje Europy. Zajimawa běše tež parna mašina z lěta 1914. We wulkej hali wonješe za wolijom a tukom, a mějachmy zaćišć, zo parnica hnydom dźěłać započnje.

K zhromadnej kopańcy steješe bohužel jenož wosom serbskich koparjow na hrajnišću. Čěscy hrajerjo mustwo tuž wudospołnichu. W prěnim połčasu hosćo po wrotach Maika Brězana njewočakowano nawjedowachu. Po přestawce pak běchu domjacy lěpši a docpěchu hišće štwore wrota. Wo kónčne 4:2 postara so znowa Brězan z jědnatku.

Veröffentlicht in Sport
Bitte anmelden, um einen Kommentar zu posten

Serbska debata

Neuheiten LND