Tež w Njebjelčicach su młodostni njedawno beachvolleyballowy turněr z wosom mustwami přewjedli. Wone běchu z Radworja, Nuknicy, Pančic-Kukowa, Chrósćic, Mi­łoćic, Serbskich Pazlic a Njebjelčic. Wosme zastupnistwo bě CTP-crew, štož su čłonojo młodźinskeho kluba­ Serbske Pazlicy/Njebjelčicy. Woni běchu turněr hłownje organizowali.

W skupinje A hrajachu Miłoćicy, Ra­dwor, Serbske Pazlicy a Njebjelčicy, w skupinje B Pančicy-Kukow, Nuknica, CTP-crew a Chrósćicy. W skupinje A so prěnje hry njerozsudnje skónčichu, tak zo bě wočiwidne, zo dyrbja so małke dypki ličić. Nawjedowali su Radwor kaž tež Serbske Pazlicy ze štyrjomi dobytymi sadźbami. Radworčenjo pak mějachu wjace małkich dypkow a so tak přesadźichu.

W skupinje B so wot wšeho spočat­ka pokazowaše, zo budźetej mustwje z Chrósćic a Pančic-Kukowa najlěpšej. W poslednjej hrě zetkachu so Chróšćenjo z volleyballistami z Pančic-Kukowa. Klóšterscy sportowcy móžachu so we woběmaj sadźbomaj přesadźić, a nastupichu w finalu přećiwo Radworjej.