Šulerjo Serbskeho gymnazija Budyšin (SGB) dobychu w tudyšej Sprjewinej kupjeli wokrjesne wurisanje šulow w beachvolleyballu, a to w starobnymaj skupinomaj II a III.

Prěnje wubědźowanje we wobłuku „Młodźina trenuje za olympiju“ noweho šulskeho lěta wotmě so w Budyskej Sprjewinej kupjeli. Beachvolleyballisća štyrjoch šulow zwěsćichu po systemje „best of three“ swojeho dobyćerja. Mustwa wobstejachu stajnje z hólčeje a holčeje dwójki kaž tež z měšaneho porika. W młódšej starobnej skupinje (sk) III (7. do 9. lětnik) hrajachu šulerjo SGB jenož přećiwo Ewangelskej srjedźnej šuli Rakecy. Kónčny rezultat 3:0 jasnje klinči, njebě pak žane mědlizanje. Tak přesadźištaj so Felix Jurk z Delnjeje Kiny a Matthias Pilz z Budyšina dwójce snadnje z 21:19. Holči porik z Lizu Hrjehorjec z Noweje Wjeski a Laviniju Bührdelec z Budyšina trjebaše samo tři sadźby, prjed hač jako dobyćer pěsk wopušći. Na kóncu rěkaše 21:18, 17:21 a 15:10. Jeničce sportowy duel na miksowej runinje bě jasna naležnosć za SGB z Verenu Suchec z Chrósćic a Richardom Pašku z Dobrošic, kotrajž so z 21:13 a 21:14 suwerenje přesadźištaj.