ST Njeswačidło

– ST 1922 Radwor 3:5 (1:1)

Zestawa hosći: Šěrak – Šram, Zähr (85. Buša), F. Šěrak, Wjenka, von Karwin (70. Omran), Zimmermann, Nuk, Winar, Bejmak, Schulze (82. Hančik)

Radworscy startowachu ofensiwnje do hry. Po zažnych móžnosćach Daniela Nuka a Toma Schulza wojowaše so tež hosćićel do hry. Prěnja chutna třělwa domjacych hnydom sedźeše. Wólny kop Johannesa Mahra z hnědźe 30 metrow bu za wrotarja Christopha Šěraka přeco dlěši a zadyri do dołheho praweho róžka (35.). Krótko po nawjedowanju wotwobara Šěrak dalši wólny kop k róžkej. Poslednje mjeńšiny prěnjeho połčasa słušachu jasnje Radworčanam. W 45. min. předrě so Schulze na prawym boku a posłuži Paula Zimmermanna na kromje šěsnatki. Z preciznej niskej třělwu do delnjeho lěweho kuta wrotow wón wuruna.