ST 1922 Radwor

– Rakečanske ST II 3:0 (1:0)

Zestawa domjacych: Wróbl – Zähr, Šram, Šěrak, Henke, Zimmermann, Nuk (87. Omran), von Karwin, Winar, Bejmak, Schulze (75. Buša)

Mustwje Radworskich a Rakečanskich koparjow stej sej zawčerawšim, njedźelu, při najrjeńšim nazymskim wjedrje napřemo stałoj. Wot spočatka wuwiwaše so intensiwna hra, kotraž wotměwaše so nimale poł hodźiny mjez šěsnatkomaj. Prěni dobry nadběh domjacych běše strašny. Swobodnje stejo pak Tom Schulze daloki bul nimo zhłójčkowa (31.). Krótko po tym móžeše jenož hišće łata za hosća wuchować. W padnjenju prasny třělwa Anthonyja Karwinskeho von Karwina do metala (32.). Nětko so móžnosće před wrotami Rakečanow kopjachu, a w 37. min. w jich klětce prěni raz zaklinka. Wólny kop Paula Zimmermanna móžeše wrotar jenož doprĕdka wotwobarać, von Karwin steješe na prawym blaku a sadźi kulowatu kožu k 1:0 pod łatu.