Z Berlina namołwjeja, wojowanja w Donbasu zakónčić
Lübeck/Berlin (dpa/SN/K). W hanseatiskim měsće Lübecku schadźuja so dźensa a jutře wonkowni ministrojo najwjetšich zapadnych industrijnych statow G 7. Ruska na jich wuradźowanjach njeje wobdźělena – ju su z tohole kruha wuzamknyli, po tym zo bě sej loni połkupu Krim zaso přiswojiła. Na spočatku zeńdźenja tež ameriski wonkowny minister John Kerry njebě přitomny, dokelž měješe so w kongresu USA na słyšenju nastupajo dojednanje z Iranom atoma dla wobdźělić. Wón přidruži so hakle jutře swojim kolegam z Němskeje, Kanady, Wulkeje Britaniskeje, Francoskeje, Italskeje a Japanskeje.