Před Libyskej najskerje 400 ćěkancow zahinyło
Rom/Berlin (dpa/SN/K). Dołhož teroristiska milica Islamski stat w rjedźe krajow Bliskeho wuchoda mordujo wójnu wjedźe, budu ludźo z nich ćěkać. Zo je to samo chětro strašne, wo tym swědči nazornje kaž bolostnje powěsć, zo je na wšěch 400 ludźi, mjez nimi tójšto dźěći, prawdźepodobnje zahinyło, jako bě so jich łódź póndźelu před libyskim přibrjohom powróćiła. Italska přibrjóžna straža zdźěli, zo zamó 144 žonow a muži wuchować. Njezbožo je najwjetše po katastrofje w oktobru 2013 z 360 mortwymi a zbudźi znowa wulku diskusiju wo politice Europy napřećo ćěkancam.
Tuchwilu přichadźa do Italskeje wjele tysac migrantow předewšěm z krajow južnje Sahary a ze Syriskeje. Mnohe łódźe wopušćeja Libanon. Wot pjatka sem je přibrjóžna straža 8 500 ludźi wuchowała. W Italskej su mnohe přijimanske lěhwa dospołnje přepjelnjene. Na Lampedusy žiwori 1 400 ćěkancow w lěhwje, kotrež je za 250 myslene było.