Tež w 50. lěće swojeho wobstaća su Wojerowske hudźbne dny zaso wosebity serbski poskitk do programa přiwzali. Pod hesłom „Sagenhaftes aus der Lausitz“ wotmě so wčera literarno-hudźbny wječor na Wojerowskim hrodźe.

Wojerecy (DGe/SN). W jubilejnym lěće Wojerowskich hudźbnych dnjow bě to wosebita ideja, kotraž publikum na połnje wobsadźenej žurli zaja: Powěsće z Łužicy a słowjanska hudźba wot Korle Awgusta Kocora, Bjarnata Krawca, Antonína Dvořáka, Henryka Wieniawskeho a dalšich zjednoćichu so k harmoniskim scenam a wobradźichu připosłucharjam serbski wječor cyle hinašeho razu.