Błudźenk ze šwedskeho zornowca z čornej granitnej wopomnjenskej taflu dopomina wot wčerawšeho na Horje na najwuznamnišeho syna wsy. „Jakub Nowak-Horjanski * 3.6.1864 na Horje † 21.2.1938 we Worklecach, farar, domiznowědnik, spisowaćel“ na tafli čitaš.
Hora (ML/SN). Nimale sto Serbow z Bóščanskeje gmejny, z Budyskeje a Kamjenskeje župy, mjez nimi tež jednaćel Domowiny Bjarnat Cyž, Maćicarjo a čłonojo TCM z předsydu Jurjom Špitankom zeńdźechu so wčera popołdnju k swjatočnosći. Chróšćanski wosadny farar Clemens Hrjehor poswjeći wopomnišćo, kotrež je Bóščanski wjesnjanosta Stanij Ryćer wotkrył. Přitomni modlachu so Wótčenaš a zanošowachu kěrluše „Božo, ty, Serbow wodźił sy a škitał“, „Nět meja na zeleni“ a „Daj, Knježe, z twojim žohnowanjom“.
