Weselsky ma twjerdu heju, politika znjeměrnjena
Berlin (dpa/SN/K). Stawk lokomotiwnikow je dźensa rano miliony dojězdźowarjow a pućowacych nuzował, druhe wobchadne srědki wužić. Čłonojo Dźěłarnistwa lokomotiwnikow (GdL) běchu rano we wosobowym wobchadźe Němskeje železnicy dźěło złožili a chcedźa z nim hakle njedźelu rano pokročować. Nakładne ćahi njeběchu hižo wčera popołdnju jězdźili.
Ćežišća stawka su Berlin, Halle, Frankfurt nad Mohanom a Mannheim. Po narunanskim jězbnym planje jězdźa ćahi „stabilnje“, kaž Němska železnica informuje. W regionach Halle, Lipsk a Drježdźany bě rano zahe jeničce 15 procentow regionalnych ćahow po puću. Pozdźišo je w Sakskej, Saksko-Anhaltskej a Durinskej wjace ćahow jězdźiło, dokelž bě wjac lokomotiwnikow na dźěło přišło, hač běchu wočakowali. Hinak hač na zapadźe njeje na wuchodźe mjez lokomotiwnikami nimale žanych zastojnikow, kotřiž njesmědźa stawkować.