Kamjenc bjez boja přepodaty

Donnerstag, 07. Mai 2015
Artikel bewerten
(0 Stimmen)

7. meje rano je dwanaće armejow 1. ukrainskeje fronty w Hornjej Łužicy, we wuchodnej Sakskej a na juhu Šleskeje po 550 kilometrow dołhej fronće ofensiwu přećiwo wójsku Schörnera zahajiło. Hižo dźeń do toho popołdnju běchu sowjetscy a pólscy wojacy wokoło Zubornički a Njeswačidła kaž tež w Delanach wobkedźbowali, zo so němske jednotki z městnami na juh wotsaleja. W našej domiznje zwrěšći tak 19. apryla zahajena, zdźěla za Wehrmacht hišće wuspěšna poslednja tankowa bitwa, kotraž bě sej wulke wopory žadała.

Něhdźe 5 000 sowjetskich wojakow bě tule swoje žiwjenje woprowało. Wjace hač 2 000 pólskich bojownikow w njej padny, z nich 26. a 27. apryla něhdźe 350 jeničce w Zejicach a Lejnje, a na 500 Polakow wokoło Kaponicy. Južnje tuteje hory je row za 65 pola Łupoje a Łupjanskeje Dubrawki padłych němskich wojakow. Najmłódši z nich bě 16lětny Lipšćan Siegfried Müller. W Njeswačidle je 85 němskich wojakow pochowane. We Łu­žicy padnjeni Polacy namakachu swój posledni wotpočink na wulkim wojerskim pohrjebnišću na kromje Zgorzeleca.

Přisłušnicy 2. pólskeje armeje su 7. meje Njeswačidło, Wětrow, Łuh, Łupoj, Radwor, Chrósćicy, Worklecy, Jaseńcu, Łusč, Haslow, Hodźij a dalše wsy Budyskeho a Kamjenskeho wokrjesa wuswobodźili. Nawječor docpěchu woni awtodróhu do Drježdźan mjez Rakojdami a Ohornom. Nalěwo wot pólskeho wójska postupowaše sowjetska 9. gardowa diwizija parašutistow na Kamjenc a Kinspork. Antifašisća běchu nad Kamjencom běłe płachty wupójsnyli. Kamjenski komunist Stefan Wicha dźěše sowjetskim wojakam napřećo, zetka jich pola Bambrucha a dowjedźe jich do města nad Čornym Halštrowom, kotrež bu bjez boja přepodate. Kinspork bu tohorunja zdobyty. Sowjetscy parašutisća stejachu nětko před Połčnicu a Ottendorfom-Okrillu.

28. sowjetska armeja wuhna němske wójsko tón dźeń ze wšěch wsow pozdźišeho Nišćanskeho wokrjesa hač k Limasej (Königshainer Berge).
M. Laduš

Veröffentlicht in Politika
Bitte anmelden, um einen Kommentar zu posten

Anzeige