Dale za serbsku rěč so zasadźeć

Freitag, 08. Mai 2015
Artikel bewerten
(0 Stimmen)

Dohromady wosom ludźi kandiduje za no­wu Radu za serbske naležnosće Braniborskeje w aktualnej legislaturnej periodźe. Wčera su so woni w Choćebuskim Serbskim domje předstajili.

Choćebuz (HA/SN). Na wólbny forum přichwata něhdźe 40 zajimcow. Přeprosyłoj běštej na njón Choćebuska Domowinska skupina a redakcija Noweho Casnika. Šefredaktor delnjoserbskeho tydźenika Gregor Wieczorek je dwuhodźinske zarjadowanje moderěrował. Braniborska bě postajiła, zo wotměja so wólby do Rady za serbske naležnosće 31. meje, štož budźe za Delnich Serbow historisce wažny dźeń. Wšako móža potom prěni króć na jara demokratiske wašnje wuzwolić swój wažny serbski politiski gremij. To je pospyt we wobłuku braniborskeje mjeńšinoweje kaž tež němskeje politiki.

Kaž běchu to župa Delnja Łužica a dalše delnjoserbske towarstwa namjetowali, su so kandidaća – dwě žonje a šěsć muži – wčera wječor w Choćebuskim Serbskim domje předstajili a rozłožichu swoje zaměry. W srjedźišću diskusije steješe prašenje, za čo chcedźa so kandidaća zasadźeć. Wšitcy wosmjo zwuraznichu, zo su za nich dalše a nowe prócowanja za zachowanje a wozrodźenje serbskeje rěče najwažniši wobłuk skutkowanja, wosebje w pěstowarnjach a šulach. Dalšej dypkaj stej rozšěrjenje serbskeho sydlenskeho ruma a wšo to, štož ma činić z dalšej energijowej politiku we Łužicy. Wšitcy kandidaća wuprajichu so přećiwo dalšemu wudobywanju brunicy.

Rěč bě tež wo tym, kotre móžnosće a potency Rada za serbske naležnosće Braniborskeje scyła ma. Dotalni čłonojo gremija, třo z tuchwilnych kandidatow, zwěsćichu, zo móže jako poradźowacy wuběrk krajneho sejma ze swojim skutkowanjom a wustupowanjom tójšto doc­pěć­­ a wobwliwować rozsudy braniborskeho parlamenta a knježerstwa. Gerd-Rüdiger Hoffmann (Lěwica), bywši čłon kraj­neho sejma, kiž bě ze serbskej radu wusko hromadźe dźěłał, zwěsći, „zo bě wona swoje kompetency často překročała, štož pak je zdobom wuraz jara aktiwneho a kreatiwneho dźěła čłonow“ rady.

Wčerawše zarjadowanje je pokazało, zo njebudźe lochko so za toho abo tamneho kandidata rozsudźić.

Veröffentlicht in Politika
Bitte anmelden, um einen Kommentar zu posten

Anzeige