„Hač móžemy inwestować, to dźensa hišće prajić njemóžemy“ – sada, kotraž desiluzioněruje. Worklečanska gmejna je wočiwidnje w tak špatnym financielnym połoženju, zo hižo kredit za renowaciju šule dóstać njemóhła. Tule pak pokazuje so zakładny problem našeho němskeho stata: komunam, bazy demokratije, pobrachuja pjenjezy. Pjenježne połoženje je w mnohich gmejnach katastrofalne. Ale runje jich měł stat podpěrować. W komunach mjenujcy bije wutroba našeho kraja. Hdyž pak sej gmejna ani njemóže dawno trěbny přetwar šule dowolić, potom njezadźiwa, zo bywaja ludźo dźeń a bóle frustrěrowani. Prašenje, kotrež je přeco zaso słyšeć: „Čehodla je za druhe projekty milionow eurow k dispoziciji, nic pak za našu šulu?“ Tole je indic za to, zo njespokojnosć so hustohdy na hněw na stat přeměnja. Worklečan gmejna je nětko ta, na kotruž wšitcy swarja, ale poprawom njeje wona winica. Wina je njefairny podpěranski system stata. Maximilian Gruber

Berlin (dpa/SN). Ukrainscy Romojo, kotřiž su po februaru 2022 před ruskej nadpadniskej wójnu do Němskeje ćeknyli, dožiwja direktny, strukturelny a insti­tucionalny anticyganizm. Tole wuchadźa z monitoroweje rozprawy, kotruž je centrum za přizjewjenje a informaciju wo anticyganizmje (MIA) kónc minjeneho tydźenja w Berlinje wozjewił. „Wšědna diskriminacija pokazuje so mjez druhim při pytanju ludźi za kma­nymi bydle­nje­mi, kubłanjom, socialnym zastaranjom a dalšimi pomocnymi posłužbami“, zdźěli jednaćel centruma dr. Guillermo Ruiz Torres.

Karlsruhe (dpa/SN). Krótko do jednanjow při zwjazkowym wustawowym sudnistwje nowe wólbne prawo nastupajo, su sebi zastupjerjo amploweje koalicije wěsći, zo budźe sudnistwo tutu reformu přiwzać. „Ludźo nimaja hižo zrozumjenja za to, zo bywa zwjazkowy sejm dźeń a wjetši“, praji wutoru FDP-politikar Konstantin Kuhle w Karlsruhe. Koalicija bě so na to dojednała, mnóstwo zapósłancow na 630 wobmjezować – to je někak sto mjenje hač tuchwilu. Zapósłanc SPD, Sebastian Hartmann, pomjenowaše reformu, kotruž běchu loni nastorčili, ­jako historisku šansu, zo by so dowěra wolerjow do fairneho a sprawneho wólbneho systema zwyšiła. Wot dźensa, wutory a tež srjedu zaběra so druhi senat sudnistwa z nowym wólbnym prawom. Wotstronić chcedźa z reformu nadbytkowe a wurunanske mandaty. Tež klawsla wo zakładnych mandatach ma so wotstronić. Wot tuteje profitowachu w zašłosći wosebje Lěwica a CSU. CSU bě nětko, nimo mnohich priwatnikow, w Karlsruhe přećiwo reformje skoržiła. Wusud drje budu hakle za někotre měsacy wozjewjeć, dokelž su jednanja naročne.

Do wuhenja padnył je šup minjeny kónc tydźenja w Berlinje – a bu w druhim pospyće wot wohnjoweje wobory wuchowany. Wobornicy běchu spočatnje z rěblom podarmo spytali, šupa wućahnyć. Skótna lěkarka móžeše pomhać: Wona zwěrjo pohłuši. Na to móžachu małeho šupa wuchować. „Wšitcy běchu zbožowni“, wohnjowa wobora piše.

Njelubozne zetkanje z dingami w Awstralskej měł je spěwar Johannes Oerding (42). Hnydom pjeć dźiwich psow jeho wobkružichu, měrjo so na całty spěwarja. „To je ći naraz cyle hinak“, hudźbnik nowinarjam rjekny. Oerding njeměješe ničo při sebi, zo móhł so zakitować. Na zbožo njeje so ničo stało. Na potrjechenych městnach, na přikład na kupje Fraser Island, zamołwići doraznje před zwěrjatami warnuja. Te njeměrja so jenož na jědź turistow, ale wohrožuja tež dźěći.