Łódźi wobswětoškitneje organizacije Greenpeace „Esperanza“ (zady) a „Rainbow Warrior“ stej dźensa z Hamburgskeho přistawa do směra na Sewjerne morjo wotjěłoj. Tam chcedźa fachowcy organizacije škody w mórskej přirodźe dokumentować, kotrež tam płunowa a wolijowa industrija přeco hišće při wudobywanju zawinujetej. Foto: dpa/Daniel Bockwoldt

Opozicija: Hišće tójšto prašenjow

Donnerstag, 30. Juli 2020 geschrieben von:

Berlin (dpa/SN). W aferje wokoło insolwentneho financneho posłužbnika Wirecard maja FDP a Zeleni po wčerawšim wurjadnym posedźenju financneho wuběrka zwjazkoweho sejma přepytowanski wuběrk za trěbny. Kaž posedźenje z woprašowanjom financneho ministra Olafa Scholza (SPD) a hospodarskeho ministra Petera Altmaiera (CDU) wujewi, je hi­šće tójšto prašenjow, rjekny zapósłanc FDP Florian Toncar wčera wječor w Berlinje. „Je wotwidźeć, zo dyrbimy so tež w přepytowanskim wuběrku z naležnosću zaběrać.“

Podobnje hódnoći to zastupnica Zelenych w financnym wuběrku Lisa Paus. Tež wona bě po wčerawšim posedźenju financneho wuběrka wšo druhe hač spoko­jom. W přepytowanskim wuběrku chcyła so Paus tež zastupnikow kanclerskeho zarjada prašeć, wona dźensa rano w sćelaku ZDF připowědźi. „Stejimy cyle na spočatku wotkrywanja.“

Kritizuje cofnjenje wojakow USA

Donnerstag, 30. Juli 2020 geschrieben von:

Berlin (dpa/SN). Fachowča FDP za zakitowanje Marie-Agnes Strack-Zimmermann je planowane cofnjenje nimale 12 000 wojakow USA z Němskeje raznje kritizowała. „To je najprjedy raz wosobinske wotličenje prezidenta. To je akcija kamikaze“, rjekny wona w rańšim magacinje sćelaka ZDF z pokazku na prezidenta USA Donalda Trumpa. Tón chcył Němsku trjechić, trjechi pak NATO jako cyłk, štož so skónčnje na Američanow samych wuskutkuje. Jenički dobyćer je ruski prezi­dent Wladimir Putin. „Tón drje je so z luteho wjesela dźensa w nocy lědma do łoža namakał.“ NATO je politikarce FDP hladajo na wohroženje ze stron Ruskeje „wažny pokład“. To nětko prezident USA skóncuje, komuž po słowach Strack-Zimmermann „w hembjerkach šeri“.

Knježerstwo USA chce 12 000 swojich wojakow z Němskeje cofnyć. Potrjechene su zepěranišća w Bayerskej, Badensko-Württembergskej a Porynsko-Pfalcy. Trump bě to hižo w juniju připowědźił, dokelž Němska po jeho měnjenju přemało za brónjenje wudawa.

Žana normalita w chorownjach

Donnerstag, 30. Juli 2020 geschrieben von:

Braniborska ministerka za strowotnistwo kritizuje wusměrjenje na dobytk

Podstupim (dpa/SN). Chorownje w Braniborskej so krok po kroku k normal­nemu dźěło nawróćeja – kaž do koronapandemije pak njejsu w dalokej měrje hišće­ wućežene. Tuchwilu su to po trochowanju towaršnosće krajnych cho­row­njow ze 65 do 70 procentami, normalne wućeženje by 80 do 85 procentow wu­činjało. „Njejsmy hišće­ w normalnym dźěle“, rjekny jed­naćel towaršnosće Michael Jacob. Tomu po jeho słowach tež lětsa wjace tak njebudźe.

Za čas raznych wobmjezowanjow koro­ny dla běchu chorownje jeničce ze 40 do 50 procentami wućežene. Hłowna přičina toho běchu prawidła dodźerženja wěstotneho wotstawka a předpisy hygieny. Tak smědźeštaj we wjace­łožowych stwach najwjace dwaj pacientaj być. Nimo toho so mnozy chorownjow zda­lowachu, dokelž so bojachu, zo so tam z wirusom natyknu. „Tutón strach wšak je runje w chorownjach ekstremnje snadny“, Jacob wuzběhny.

Powšitkowna wěda

Donnerstag, 30. Juli 2020 geschrieben von:
Znajeće hišće wony žorćik z kónca 90tych lět?: Kajki je rozdźěl mjez ruskimi a ame­riskimi wojakami? Wotmołwa: Rusow smy wotbyli. Na to dyrbjach myslić, jako słyšach dźensa wo konkretnych planach USA, nimale 12 000 swojich wojakow z Němskeje cofnyć, dokelž njewudamy pječa dosć pjenjez za brónjenje. A runjewon samozrozumliwje jewješe so ze stron zastupnicy FDP argument, zo je Němska nětko hladajo na hrožacy nadpad Ruskeje wosłabjena, dokelž pobrachuje 12 000 ameriskich wobškitarjow. Nó hladaj, sej myslach: Je to mjeztym tajke něšto kaž powšitkowna wěda, zo nas Ruska wohroža. Dyrbiš to jenož často dosć wospjetować, doniž wšitcy do toho njewěrja. Kak da by było, bychmy skónčnje zaso normalne styki k Ruskej pěstowali, město toho zo dale do antiruskeje truby trubimy. Móžemy hnydom započeć. Nječakajmy, doniž njeje so tež posledni ameriski wojak z Němskeje zminył. Marko Wjeńka

Wótry wołojnik (30.07.20)

Donnerstag, 30. Juli 2020 geschrieben von:
Dowolowa romantika ŠNAK

To a tamne (30.07.20)

Donnerstag, 30. Juli 2020 geschrieben von:

Zastanišćo železnicy přewidźał bě lo­komotiwnik intercity-ćaha pola Bonna a je prosće dale jěł. Pasažěrojo, kotřiž chcychu tam wulězć, móžachu IC hakle na přichodnym dwórnišću w Koblenzu wopušćić. Dokelž na železniskej čarje mjez Kölnom a Bonnom runje twarja, měješe ćah město hłowneho dwórnišća tuž w Bonnje-Beuelu zastać. To pak bě loko­motiwnik přewidźał. Železnica je so za misnjenje mjeztym zamołwiła.

Pozdatneje miny w pincy domu we Wurzenje dla dyrbjachu wjaceswójbny dom ewakuować. 31lětny wobydler bě po někotrych lětach prěni króć zaso do pincy pohladał a tam pozdatnu rozbuchlinu wuhladał. Po tym zo běchu cyły dom rumowali, přijědźe wosebita słužba k wotstronjenju bojowych srědkow, zo by swoje dźěło wukonjała. Spěšnje pak móžeše wšitkich změrować: Pozdatna mina njebě ničo hinaše hač stara po­mazkowa tyza.

Pytaja dale za Maddie

Mittwoch, 29. Juli 2020 geschrieben von:

Hannover (dpa/SN). W padźe zhubjeneje Maddie McCann je policija dźensa rano jednu z małozahrodkow w Hannoveru dale přepytała. Při tym zasadźichu tež mały bager. Dźěła steja po informacijach statneho rěčnistwa w zwisku z lěta 2007 z dowoloweho objekta w Portugalskej zhubjenej tehdy třilětnej. Podhladny je 43lětny Němc, kiž sedźi tuchwilu w Kielskim jastwje. Wón bydleše 2007 w Hannoveru.

Statne rěčnistwo přepytuje

Düsseldorf (dpa/SN). Po sypnjenju domskeho w Düsseldorfje z jednym mortwym dźěłaćerjom je statne rěčnistwo přepytowanja zahajiła. Při tym chcedźa zwěsćić, hač bě něchtó sypnjenje zawi­nował. Dotal njewědźa, hač wšitke twarske dowolnosće předležachu. Twarjenje je so póndźelu sypnyło. Něšto pozdźišo dźěłaćerja pod rozwalinami mortweho namakachu. Za dalšim zhubjenym dźěłaćerjom intensiwnje pytaja.

Schröder: Trump ma šansy

Chětro napjate je połoženje tuchwilu w přepjelnjenych lěhwach ćěkancow na juhu Italskeje. Jeničce w juliju je tam 5 300 nowych migrantow dojěło. W lěhwach, kotrež steja koronapandemije dla pod karantenu, dochadźa stajnje zaso k njeměram. Z lěhwa w přistawje města Porto Empedocle (hlej wobraz) je so póndźelu 520 tuneziskich migrantow wudobyło. Foto: dpa

Wjace pjenjez za dźěći

Mittwoch, 29. Juli 2020 geschrieben von:

Berlin (dpa/SN). Dźěćacy pjenjez wot přichod­neho lěta wo 15 eurow zwyša, kaž zwjazkowe knježerstwo dźensa wobzamkny. Je to centralny dźěl zakonja wo wo­lóženju swójbow. Po tym ma so tež bjezdawkowy dźěćacy podźěl wo 500 na cyłkownje 8 388 eurow powjetšić. Hižo w koaliciskim zrěčenju 2018 běchu zwyšenje dźěćaceho pjenjeza wo cyłkownje 25 eurow zakótwili. Po prěnim zwyšenju wo dźesać eurow spočatk 2019 jón wot 1. januara wo dalše 15 eurow zwyša.

Wobzamknyli su dźensa tež nowo­rjadowanje za wulkorězarnje, kaž bě to zwjazkowy dźěłowy minister Hubertus Heil (SPD) připowědźił. Tak smědźa rězar­nje přichodnje jenož hišće ze swójskimi dźěłowymi mocami skót rězać a ro­zebrać. Zasadźenje špatnje płaćenych pož­čenych dźěłowych mocow chcedźa zakazać a kontrole w zawodach zesylnić.

Anzeige