Hdyž wo přichod serbskeho kubłanja dźe, wjerći so hladajo na šule wšo přeco wo prašenje: Što mamy sami přewzać, a kelko zamołwitosće chcemy statej přewostajić? Na wysokich šulach drje knježi wěsta awtonomija za slědźenje a wuwučowanje, najebać to ma knježerstwo politisku zamołwitosć za zakładne zaměry. Zo so na tutej wysokej powšitkownej runinje, hdźež wo cyłk wědomostneho kubłanja w Sakskej dźe, tajki „mały“ předmjet kaž sorabistika jewi, je wulki wuspěch. Społnomócnjena krajneho knježerstwa za serbske naležnosće dr. Madlena Malinkec smě so wjeselić – a wšitcy druzy zamołwići tohorunja. Z tym stat wšěm rjap skruća, kotřiž so w Lipsku, Drježdźanach, Budyšinje, Podstupimje a druhdźe za zesylnjenje profila sorabistiki angažuja. Z powšitkowneje perspektiwy je sorabistika strategisce „wulki“ předmjet: Reprezentuje najhłubše korjenje našeje domizny a zdobom najwjetšu wotewrjenosć wšěm słowjanskim ludam. Marcel Brauman

Strach před wysokosću je za tele dźěłowe městno špatna kajkosć. Tola wěda wo łódźnistwje a watowym morju stej porno tomu lěpšina. Za swoju Staru swětłownju pyta mała wuchodofriziska kupa Wangerooge noweho stražnika abo stražnicu. Požadarjo za dźěło měli po wupisanju dźěłoweho městna gmejny nimo toho ćělnje fit być. Dyrbiš znajmjeńša dwójce wob dźeń 161 schodźenkow přewinyć móc. 39 metrow wysoka čerwjeno-běło-čorna swětłownja je jedne z charakteristiskich znamjenjow znateje kupy w Sewjernym morju.

Do finala Stuttgartskeje olympiady kucharjow su wčera tak mjenowane Live-Carver swoje zamóžnosće dopokazali a z nožom wuměłske figury ze zeleniny a sada, twarožka, cokora a šokolody rězbarili. W běhu třoch hodźin dyrbjachu pjeć wšelakich twórbow pokazkow zhotowić.

Rewitalizacija rěče a digitalizacija stej ćežišći dźěła Załožby za serbski lud. Jeje direktor Jan Budar skedźbnja w bilancy 2023 a wuhledźe do přichoda wosebje na potrjebu serbowacych fachowcow.

Budyšin (SN). Lěto 2023 je załožbje nowych radźićelow w załožbowej radźe a přiběrace próstwy wo spěchowanje wobradźiło. Tež něhdyši radźićeljo su zarjadej na polu digitalizacije takrjec domjace nadawki zawostajili, zo by so wosebje institucije přesahowace dźěło polěpšiło. Za to stej přidatna personelna struktura a poradźowacy gremij fachowcow trěbnej. Direktor załožby widźi to jako prěnje wulke wužadanje w nowej wólbnej periodźe załožboweje rady: „Mamy nětko hižo ćeže, wšitke wotewrjene městna w serbskich institucijach a projektach změny strukturow adekwatnje wobsadźić. Tak widźimy, zo dyrbimy poskitki za spěšne nawuknjenje serbšćiny nuznje dale wu­twarjeć.“

Berlin (dpa/SN). Zwjazkowy kancler Olaf Scholz a nowy ministerski prezident Francoskeje Gabriel Attal staj wuznam zhromadneho dźěła wobeju krajow hladajo na aktualne wužadanja wuzběhnyłoj. Kmanosć mjezsobneho wothłosowanja Němcow a Francozow je hladajo na šmjatki swěta wažniše hač hdy do toho, rjekny Attal na swojim nastupnym wopyće dźensa w Berlinje, hladajo wosebje na wójnje w Ukrainje a na Bliskim wuchodźe. „Nas wjace wjaza hač dźěli.“

Kretschmann za čorno-zelenych

Stuttgart (dpa/SN). Badensko-württembergski ministerski prezident Winfried Kretschmann ma čorno-zelene knježerstwo na zwjazkowej runinje dale za realistisku móžnosć. Šansy za tajki zwjazk CDU a Zelenych w Berlinje po wólbach zwjazkoweho sejma 2025 hódnoćeše politikar Zelenych w rozmołwje z nowinarjemi jako „jara wulke“. CDU je hospodarstwu přichilena strona, Zeleni staraja so wo škit wobswěta a klimy. „To je dobra konstelacija“, tak Kretschmann.

Charles III. na rak schorjeł