Berlin (dpa/SN). Reforma zwjazkoweho zakonja k datowemu škitej ma prawa přetrjebarjow napřećo Schufje zesylnić. Z wotpowědnym naćiskom zakonja, kotryž je kabinet zawčerawšim schwalił, reaguje zwjazkowe knježerstwo na wusud Europskeho sudnistwa (EuGH). Najwyše europske sudnistwo bě zwěsćiło, zo je pruwowanje bonity přetrjebarjow dowolene, ale při tym měli so hranicy za zwěsćenje datow dodźeržeć. K datam, kotrež njesmědźa so po naćisku zakonja přichodnje wužiwać, zo móhli předewzaća płaćenjakmanosć ludźi posudźować, słušeja mjez druhim bydlenska adresa, mjeno abo na wosobu so poćahowace daty z wužiwanja socialnych syćow. Tež bankowe daty wosobow njesmědźa so hižo nihdźe podać.

Pozadk rozsuda EuGH z decembra běštej dwaj padaj z Němskeje. W jednym padźe bě žona skoržiła, kotrejž běchu kredit zapowědźili. Wona namołwi Schufu, zapis wotstronić a přistup k datam přizwolić, čemuž Schufa njewotpowědowaše.

Drježdźany (dpa/SN). Sakski krajny sejm chcyše dźensa na wosebitym posedźenju wo zasadźenju přepytowanskeho wuběrka k wobchadźenju ze spěchowanskimi srědkami w socialnym ministerstwje wothłosować. Přepytowanski wuběrk dyrbi na iniciatiwu frakcije AfD nastać. Pozadk toho je wosebita rozprawa krajneho zličbowanskeho zarjada. Tón bě so na tym postorkował, kak je so spěchowanska směrnica za integraciju ćěkancow zwoprawdźiła a w tym zwisku sakskemu socialnemu ministerstwu njezakonske zarjadniske jednanje w „njewšědnej měrje“ wumjetował.

Z přepytowanskim wuběrkom chce AfD nětko zamołwitosće wuslědźić dać. Socialne ministerstwo je hižo reagowało a spěchowansku směrnicu změniło. Nimo toho su přisłušneho statneho sekretara Sebastiana Vogela na wuměnk rozžohnowali. Po wustawje dyrbi krajny sejm přepytowanski wuběrk zasadźić, hdyž pjećina čłonow sejma to podpěruje. Frakcija AfD w krajnym sejmje hižo trěbnu ličbu hłosow docpěwa.