Berlin (dpa/SN). Zwjazkowy sejm chcyše dźensa zwjazkowy etat 2024 doskónčnje wobzamknyć. Schwalić chcychu w tym zwisku tež wjele diskutowane wotstronjenje dawkowych lěpšinow za ratarski diesel, štož je dźěl zakonja wo financowanju etata. Z nim chce amplowa koalicija SPD, Zelenych a FDP lutowanske naprawy přesadźić. Zakoń dyrbi Zwjazkowa rada hišće schwalić, štož pak tam dźensa na planje njemějachu.
W etaće 2024 su wudawki 476,8 miliardow eurow předwidźane, najprjedy raz z nowymi kreditami 39 miliardow eurow. Po tutym puću bychu zakoń wo wobmjezowanju zadołženja prěni króć po koronakrizy zaso dodźerželi.
Z wotstawkom najwjetši etat ma dźěłowy minister Hubertus Heil (SPD) z něhdźe 175,6 miliardami eurow. Wulki dźěl pjenjez přepokazaja rentowemu zawěsćenju, zo njeby so system zwjezł. K tomu přińdu dalše wudawki kaž wobydlerski pjenjez.
Inwestować chcedźa cyłkownje 70,5 miliardow eurow, na přikład do syće kolijow a dróhow. Etat zakitowanja wopřija 52 miliardow eurow, k tomu přińdu dalše miliardy eurow z wurjadneho zamóženja za zwjazkowu woboru.
Kijew (dpa/SN). Ruska je Ukrainu minjenu nóc znowa masiwnje z trutami nadběhowała a w industrijnym měsće Krywyj Rih wjetši wupad miliny zawinowała. Dźesaćitysacy domjacnosćow a industrijne zawody w měsće w kónčinje Dnopropetrowska běchu wobškodźenych objektow dla wot zastaranja z milinu wotrěznjene. Potrjechene bě tež hórnistwowe předewzaće. Něhdźe sto hórnikow bě za čas hawarije w podkopkach. Někotrych z nich móžachu mjeztym wuchować. Fachowcy z wotmachom na tym dźěłaja, zastaranje z milinu zaso zaručić.
Ruske nadpady měrjachu su wosebje na južne kónčiny Ukrainy. Powětrowy škit ukrainskeho wójska je po swójskich informacijach jědnaće z cyłkownje 24 ruskich trutow wottřělił. Truty su cyle zaměrnje wažnu infrastrukturu ukrainskeje metropole nadběhowali. Ukraina so mjeztym nimale dwě lěće ruskemu nadpadej wobara.
Brüssel (dpa/SN). Na runinje Europskeje unije maja wobydlerjo přichodnje prawo na porjedźenje měć. Posrědnicy Europskeho parlamenta su so minjenu nóc ze zastupnikami čłonskich statow EU na to dojednali, twarcow wěstych wudźěłkow kaž chłódźakow, prochsrěbakow a mobilnych telefonow zawjazać, tute wěcy porjedźeć, jeli sej kupc to přeje. By to prěnje prawo na porjedźenje domjacych elektriskich nastrojow scyła było. Słužić ma tute rjadowanje tež wobswětoškitej.
Nowe předpisy pak njepłaća za wšitke wudźěłki. Wuwzate su na přikład słuchatka a meble. Dokładny prawniski tekst přichodne tydźenje wozjewja.
Komisija EU argumentuje, zo wunjese nowe rjadowanje mjenje wotpadkow a zo zadźěwa brojenju surowiznow. Tak nastawa tež mjenje klimje škodźacych maćiznow. Komisija chce něhdźe tři miliony tonow wotpadkow zalutować. Aktiwisća stajnje zaso skorža, zo zawody skóncowane nastroje prosće preč ćisnu.
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238
tel.: 03591 / 577 232 faks: 03591 / 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Zamołwita za rozšěrjenje a marketing:
Patricia Róblowa 577 273
Předań nawěškow: Janka Rögnerowa 577 220 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
Ćeknjenu wopicu zaso popadnyli su sobudźěłaćerjo zwěrjenca w Šotiskej po dny trajacym pytanju. Makak bě so njedźelu ze zwěrjenca zminył. Wobydlerjo běchu wobkedźbowali, zo so wopica rady w ptačich chěžkach z picu zastaruje. Pomocnicy tam na nju čakachu a zwěrjo z kłokom pohłušichu. Mjeztym je makak zaso w zwěrjencu.
Z winom na nadróžnych blokadach spytaja sej francoscy burja mjez šoferami wosobowych awtow sympatije zdobyć. Telewizijne sćelaki rozprawjeja wo přećelnej atmosferje a šoferach, kotřiž so ratarjam dźakuja a jich w stawku pohonjuja. W interneće pak jewja so tež kritiske hłosy: „Kraj pičkow! Žadyn dźiw, zo mamy najwyšu kwotu alkoholikarjow po wšěm swěće“, tam pisaja. Druzy so hórša, zo njejsu wobrazy žane dobre wabjenje za dostojnych francoskich winicarjow.
Moskwa (dpa/SN). Ruska a Ukraina stej so minjenu nóc mjezsobnje z trutami nadběhowałoj. Nad Belgorodskej kónčinu w Ruskej je tamniše wójsko wosom ukrainskich trutow wottřěliło, dalšej trutaj nad Woronježom a Kurskom. Tež Ukraina rozprawja wo ruskich nadpadach z trutami. Při tym zasadźuje Ruska wulke ličby trutow, kotrež zhromadnje wotleća, zo bychu ukrainski powětrowy škit přežadali. Wjacore wosoby so zranichu.
USA raketu Huthijow zničili
Washington (dpa/SN). Wójsko USA je po swójskich informacijach lětadła wotwobaracu raketu militantno-islamistiskich Huthijow w Jemenje zničiło. Raketa bě za start přihotowana a bě bjezposrědne wohroženje za lětadła USA, centralne komando wójska USA zdźěla. Huthi wot spočatka Gazaskeje wójny mjez Israelom a islamistiskej Hamas stajnje zaso nakładne łódźe w Čerwjenym morju atakuja. USA mjeztym zepěranišća Huthi w Jemenje z lětadłami nadběhuja.
Žada sej wjace personala