Swójske brónje puć do swobody
Kijew (dpa/SN). Ukrainski prezident Wolodymyr Zelenskyj ma wuwiwacu so produkciju trutow a municije w swójskim kraju za puć do swobody. „Domjaca produkcije trutow, granatow za artileriju a wojerskich jězdźidłow je we woprawdźitym zmysle produkcija našeje swobody, swobody Ukrainjanow a Ukrainy“, rjekny 46lětny wčera w swojim wšědnym widejowym poselstwje. Zelenskyj bě stajnje zaso potwjerdźił, zo chcył Rusku na bitwišću porazyć. Jenož tak móhła Ukraina rusku agresiju dołhodobnje skónčić. Połoženje na fronće mjenowaše prezident znowa „wobćežnu“.
Minjene dny běchu medije rozprawjeli, zo je Zelenskyj wyšeho rozkazowarja wójska Walerija Zalušnyho pušćił. Na ćišć USA a Wulkeje Britaniskeje pak je wón swój wukaz pozdźišo zaso cofnył.
Klingbeil: Wotsunjenje přesadźić
Osnabrück (dpa/SN). Předsyda SPD Lars Klingbeil je zwjazkowe kraje namołwjał, wot zwjazkoweho kanclera Olafa Scholza (SPD) nastorčenu iniciatiwu nastupajo wotsunjenje migrantow přesadźić. „Zwjazkowe kraje maja nětko składnosć a dyrbja ju tež wužić“, rjekny Klingbeil Osnabrückskim nowinarjam. „Stat dyrbi fungować, hdyž wo to dźe, ludźi, kotřiž njemóža pola nas wostać, wróćo pósłać.“
Podlěšenje jatby do wotsunjenja ma přichodnje tomu zadźěwać, zo wupokazanja w poslednim wokomiku zwrěšća. Amplowa koalicija bě před tydźenjomaj wotpowědny zakoń wobzamknyła.
Scholz bě hižo nazymu 2023 w rozmołwje z magacinom Spiegel rjekł: „Dyrbimy skónčnje we wulkim stilu tych wotsunyć, kotřiž nimaja žane prawo, w Němskej wostać.“ Klingbeil zdobom na to pokaza, zo trjeba Němska dale wukrajnych fachowcow. Hladajo na snadny podźěl ukrainskich ćěkancow na dźěłowych wikach sej Klingbeil žada, zo měli ćěkancy po najspěšnišim puću němsce nawuknyć a potom tule na dźěło chodźić. Zdobom wón zakituje, zo dóstawaja tež ukrainscy ćěkancy wobydlerski pjenjez a z tym wjace, hač požadarjo azyla w Němskej.
Dobra komunikacija
Porjedźenka
Na wukubłanje do Taiwana
Drježdźany (dpa/SN). Runje štyri měsacy po wotpowědnym dojednanju mjez Sakskej a taiwanskim koncernom za twar elektroniskich chipow TSMC zahaja zhromadny program wuměny talentow. Prěni młodźi ludźo podadźa so přichodnu póndźelu na studijne přebywanje do Taipehja a Taichunga, wědomostne ministerstwo w Drježdźanach wčera zdźěli. Studij na National Taiwan University je z praktiskim wukubłanjom w Training Center & Fab w koncernje TSMC zwjazany, w ministerstwje rěkaše.
Z programom „Semiconductor Talent Incubation Program“ přichodnych fachowcow za industriju połwodźakow spěchuja. Wob lěto chcedźa hač do sto młodych ludźi z Němskeje na šěsć měsacow na kupowy stat pósłać, zo bychu tam wučbny plan połwodźakow na hosćićelskich uniwersitach kaž tež dwaj měsacaj trajace zwučowanje zmištrowali.
W awgusće 2023 bě koncern TSMC připowědźił, zo chcył w Drježdźanach twornju za produkciju połwodźakow natwarić a dźesać miliardow eurow inwestować. Zdobom mějachu wobmyslenja hladajo na dosć fachowcow w Němskej.
Jónkrótne wopomnišćo na kěrchowje
Němska wita zakoń wo KI
Berlin (dpa/SN). Němska chce zakonjej EU nastupajo nałožowanje kumštneje inteligency (KI) přihłosować. Tole je zwjazkowy minister za digitalne naležnosće Volker Wissing (FDP) wčera w Berlinje připowědźił. Jednanja wo němsku poziciju k tak mjenowanemu AI Act su so z „nošnym kompromisom“ skónčili. Wissing je so hač do kónca za inowacijam přichileniše rjadowanja zasadźał a polěpšenja za małe a srěnje předewzaća wuwojował, wón rjekny. Njepřiměrjene žadanja móžeše wón wotpokazać. Wujednany kompromis je dobry zakład wuwića kumštneje inteligency, kotrejž móže čłowjek dowěrić, tak Wissing. Europa móže so tak na wuznamne městno KI wuwiwać a po wšěm swěće postajować.
Kumštna inteligenca zepěra so na mašinelne wuknjenje, při čimž software wulke mnóstwa datow přeslědźi a z toho samostatnje konkluzije sćehnje. We wšelakich wobłukach KI hižo nětko nałožuja. Tak móže KI daty kompjuterowych tomografow lěpje a dokładnišo wuhódnoćić hač čłowjek. Tež samostatnje jěduce awta spytaja, na móžne zadźerženje druhich šoferow zwoprědka reagować.
To a tamne (31.01.24)
Zapustarjo na wopory njezabyli
Lěkarjo klinikow stawkowali
Hannover (dpa/SN). Po wšej Němskej dyrbjachu so pacienća na uniwersitnych klinikach dźensa na wobmjezowanja nastajić. W tarifowym rozestajenju z krajemi je dźěłarnistwo Marburgski zwjazk wjace hač 20 000 lěkarjow a lěkarkow na 23 krajnych uniwersitnych chorownjach Němskeje do warnowanskeho stawka namołwjało. Dźěłarnistwo žada sej za lěkarjow 12,5 procentow wjace mzdy. Na centralnym zarjadowanju w Hannoveru wočakowachu tysacy wobdźělnikow.
Wustawowe sudnistwo sylnić
Berlin (dpa/SN). Unija CDU/CSU podpěruje namjet amploweje koalicije SPD, Zelenych a FDP, jako reakciju za rozrost ekstremnych politiskich stron Zwjazkowe wustawowe sudnistwo lěpje před móžnym wobwliwowanjom škitać. Tole měło so na šěrokej bazy diskutować, rjekny zastupowace frakciska předsydka Andrea Lindholz (CSU) nowinarjam. SPD namjetuje, zo měł zwjazkowy sejm přichodnje z wjetšinu dweju třećin wo tym rozsudźić. Tuchwilu dosaha jednora wjetšina.
Radšo do dobreje chorownje
