To a tamne (19.01.21)
Hoberski powětrowy balon z wobrazom Donalda Trumpa jako małe dźěćo w pjelchach a z handyjom w ruce dóstanje nětko městno w Muzeju London. Demonstranća běchu balon za čas wopyta Trumpa w Londonje wužiwali. Wobrazy sydom metrow wulkeho objekta běchu po wšěm swěće kedźbnosć zbudźili. Najwjetše wužadanje za muzej wšak je, kmane městno za balon namakać.
Škleńcu wokna přerazył je kołp w Jendźelskej, njezbožo pak wón přežiwi. Wobydlerka měješe wulke zbožo, dokelž bě kupjel krótko do toho wopušćiła. Ptak je při zražce tójšto kreje zhubił a bě zamućeny, kaž organizacija za škit zwěrjatow pisa. W hodźinje trajacej operaciji móžachu ranu pod křidłom zašić. Prawdźepodobnje chcyše kołp na bliskej rěce přizemić, ale sylneho wětřika dla dyrbješe kurs změnić. Nětko so w zwěrjatowni wočerstwja.
Skónčnje zakonsce rjadowane
Vatikan (B/SN). Bamž Franciskus je zakonsce noworjadował, zo smědźa žony oficialnje zastojnstwo lektorki abo pomocnicy při wudźělenju swjateho woprawjenja wukonjeć. Tež ministrantki smědźa nětko oficialnje k wołtarjej słužić. Ze změnu cyrkwinskeho prawa „Spiritus Domini“ kanon 230 § 1 cyrkwinskeho zakonja je po cyłym swěće wužiwana praksa skónčnje prawnisce rjadowana.
Pomhaja po cyłym swěće
Lipsk (B/SN). Skutk Gustava Adolfa (GAW) spěchuje lětsa cyłkownje 132 projektow w 50 wukrajnych partnerskich cyrkwjach z cyłkownje 1,6 milionami eurow. Hromadźe z direktnym partnerstwom regionalnych skupin GAW su pjenjezy składowali. Mjez projektami su 39 w Europje. Prezidentka GAW, prelatka Gabriele Wulz, wujasni, zo nochce pomocny skutk być jenož towarstwo „za twar cyrkwjow“, ale tež sotry a bratrow po wěrje podpěrać, jich wěru zachować a skrućić. GAW, załoženy 1832 w Lipsku, podpěruje protestantisku cyrkej w diasporje. Skutk dopomina na lutherskeho šwedskeho krala Gustava Adolfa II. (1594–1632).
Spěchuja chude dźěći
Spahn: Prěnje wuspěchi
Berlin (dpa/SN). Aktualne ličby natyknjenjow z koronawirusom su po słowach zwjazkoweho ministra za strowotnistwo Jensa Spahna (CDU) prěnja pokazka na to, zo so połoženje pomału wotputa. „Su to prěnje wuspěchi, kotrež so w statistice infekcijow pokazuja“, rjekny Spahn dźensa w rańšim magacinje ARD. Intensiwne stacije su wo dźesać, pjatnaće procentow wolóžene. „Njejsmy pak dawno hišće tam, dokal chcemy.“ Roberta Kochowy institut bě dźensa 7 141 dalšich infekcijow w běhu dnja zdźělił, štož je najmjeńša ličba po 20. oktobru 2020.
Žadaja sej Nawalneho pušćić
Tallin (dpa/SN). Baltiske kraje Estiska, Letiska a Litawska sej žadaja, w Moskwje zajateho ruskeho opoziciskeho politikarja Alekseja Nawalneho hnydom pušćić. Zajeće 44lětneho kritikarja Krjemla je „dospołnje njeakceptabelne“ rěka we wčera wječor wozjewjenej zhromadnej deklaraciji. Kraje žadaja sej nimo toho sankcije přećiwo Ruskej, njedyrbjał-li Krjeml žadanje spjelnić.
Rozumi hněw ratarjow
Kretschmer: Hišće tři tydźenje
Doma dźěłać
Berlin (dpa/SN). Zwjazkowy prezident Frank-Walter Steinmeier hladajo na wohroženje přez koronawirus namołwja, hišće bóle wot doma dźěłać. „Zmóžniće to swojim přistajenym“, apelowaše zwjazkowy prezident minjeny pjatk w Berlinje na dźěłodawarjow. Tež na dźěłowym městnje měli ličbu kontaktow pomjeńšić. „Mjenje je wjace, runje nětko.“
Přistajenych zwjazkowy prezident w zhromadnym apelu dźěłodawarjow a dźěłarnistwow napomina, wotpowědne poskitki domjaceho dźěła přiwzać. „Njechodźće do běrowa, hdyž to nuznje trjeba njeje.“ Štóž doma dźěła, škita tež swojich kolegow a swoje koleginy. Steinmeier potwjerdźi, zo je přeco hišće přewjele na koronawirus schorjenych. Ličba zemrětych jeho „rudźi a zluda“.
Žane nowe terminy šćěpjenja
Drježdźany/Podstupim (dpa/SN). W Sakskej wot dźensnišeho žane terminy za šćěpjenje njerozdawaja, ani internetnje ani telefonisce, kaž Kai Kranich wot Němskeho čerwjeneho křiža powěsćerni dpa zdźěli. Hłowna přičina je dlijace so dodawanje šćěpiwa firmy Biontech-Pfizer. „Móžemy jenož telko terminow knihować, kelkož mamy šćěpiwa“, Kranich rjekny. Nětko dyrbja zamołwići najprjedy raz wočaknyć, kak so połoženje dale wuwije. Poprawom chcychu dźensa telefoniske knihowanje terminow šćěpjenja zahajić. Najebać problemy je zaručene, zo dóstanu wšitcy hižo šćěpjeni tež trěbnu druhu sykawu.
W Braniborskej tuchwilu tohorunja móžno njeje termin šćěpjenja dóstać, dokelž nimaja dosć seruma. Ministerka za strowotnistwo Ursula Nonnemacher (Zeleni) chcyše w běhu dnja wo nadrobnosćach informować. Jasne hižo je, zo w šćěpjenskich centrumach a w chorownjach mjenje ludźi šćěpja. Kak dołho dyrbja dalše šćěpjenja přestorčić, njeje znate. W starownjach pak dale šćěpja.
Lascheta do wuchoda přeprosyć
Reakcije na wuzwolenje noweho zwjazkoweho předsydy CDU
Berlin/Podstupim (dpa/SN). Po wuzwolenju sewjerorynsko-westfalskeho ministerskeho prezidenta Armina Lascheta za noweho předsydu CDU namołwjeja wjacori politikarjo křesćanskodemokratisku stronu k jednoće. Tak je bayerski ministerski prezident Markus Söder (CSU) namjetował, při wólbach podležaneho bywšeho frakciskeho předsydu Friedricha Merza do nawodnistwa CDU wusko sobu zapřijeć. Delegaća CDU běchu sobotu na internetnym zjězdźe Armina Lascheta za nawodu strony wuzwolili. Nimo Friedricha Merza bě tež wonkowny politikar Norbert Röttgen za zastojnstwo kandidował. Po zakónčenju zjězda bě Merz iritacije zbudźił, jako so zwólniwy wupraji, do nětčišeho zwjazkoweho knježerstwa zastupić a hospodarske ministerstwo Petera Altmaira (CDU) přewzać. Zwjazkowa kanclerka Angela Merkel namjet hnydom wotpokaza.
Što su podpisma hódne
To a tamne (18.01.21)
„Přede mnu jědźe pokradnjeny pizza-taksi“, alarmowaše wobsedźer pizzerije w poruhrskim Herne policiju. 31lětny bě taksi, kotryž běchu jemu dźeń do toho pokradnyli, připadnje na dróze wuhladał. Zastojnicy wóz zadźeržachu. Za wodźidłom sedźeše bjezdomny bjez jězbneje dowolnosće. Wón bě awto jako bydlenski mobil wužiwał a w nim přenocował, je pak z nim tež z 2,7 promilemi alkohola jěł.
Lubosć k zwěrjatam, kotruž wopokazuje zarjadnistwo města Dunedin w Nowoseelandskej, žněje wulke přihłosowanje. Zamołwići zawru nětko cyły měsac přibrjóžnu dróhu, zo bychu mórsku lawicu a jeje minjeny tydźeń narodźene młodźo škitali. Wonej běštej so na bliskim parkowanišću zasydliłoj, zwotkelž so prawidłownje k morju podawatej. Wjacore lokalne medije zahorjene wo „škitnym programje“ rozprawjeja.
Njepřezjedni z wukazom cyrkwinskeho wjednistwa
Přiměrjenje strukturow w Ewangelsko-lutherskej krajnej cyrkwi Sakskeje serbscy křesćenjo Hodźijskeje wosady bolostnje začuwaja. Hodźijska wosada přisłuša wot 1. januara runja šěsć dalšim nowowutworjenemu sotrowskemu cyrkwinskemu poměrej (Schwesterkirchverhältnis). Serbski sejm nochce dosć wobkedźbowane serbske zajimy tak akceptować.
Budyšin/Hodźij/Njebjelčicy (SN/at.) Přećiwo wšěm argumentam Serbskeho wosadneho zwjazka a serbskich křesćanow Hodźijskeje wosady je wona wobstatk 1. januara wutworjeneho serbski sydlenski rum přesahowaceho sotrowskeho cyrkwinskeho poměra w cyrkwinskim wobwodźe Budyšin-Kamjenc.
Proces wotwažowanja njebu zakónčeny, je wot potrjechenych słyšeć. Město toho bu z krajneho cyrkwinskeho zarjada w Drježdźanach wukazane wutworić wulku strukturu z wosadami Biskopicy-kraj, Palow-Horni Wujězd, Porchow, Zemicy-Tumicy, Huska a Hodźij.
