Zwjazk žadasej wotewrjenje
Němska steji před nowej dobu
Stuttgart (dpa/SN). Kóždolětne zetkanje FDP na dnju Třoch kralow je lětsa dospołnje hinaše. Tak steji šef strony Christian Lindner w prózdnym Stuttgartskim operowym domje, přiwisnicy jeho digitalnje sćěhuja. Hladajo na wólby zwjazkoweho sejma lětsa nazymu chcedźa so liberalni na temy dojednać. Kaž Christian Lindner wuzběhny, je wobnowjenje w Němskej nuznje trěbne. „Tak dźe wo to, zakłady našeho kraja znowa wobjednawać. Wjele zakładnych prašenjow měli sej stajić. Stejimy před znowazałoženjom našeho kraja.“ Žórła němskeho derjeměća maja so wobnowić. Zestarjaca towaršnosć trjeba reformowane socialne systemy.
Nimale dźewjeć měsacow do wólbow chce FDP swoje politiske stejišćo postajić. Nimo wólbow zwjazkoweho sejma su lětsa tež w šěsć zwjazkowych krajach wólby sejma. Nětčiša zwjazkowa kanclerka Angela Merkel (CDU) njebudźe hižo znowa kandidować. „Potom zahaji so nowa doba, stejimy před rozsudnej cezuru“, je Lindner přeswědčeny. „Wólby zwjazkoweho sejma njepostaja wosud strony FDP, ale cyłeje Němskeje.“
To a tamne (06.01.21)
Při zražce ze sněhowym mužom bu ćah w Köthenje wobškodźeny. Intercity Němskeje železnicy bě njedźelu do figury zajěł, kotraž při kolijach steješe. A lokomotiwa so wobškodźi. Policija pyta nětko za swědkami a skedźbnja na to, zo přebytk we wobłuku kolijow žiwjenje wohroža. To wšak dyrbješe bohužel tež sněhowy muž nazhonić.
Dokelž njeje žona na wučinjene zetkanje přišła, so 59lětny w Münsteru chětro rozhněwa. Najprjedy da so do sobudźěłaćerja spěšnohosćenca a je na to samo přiwołaneju zastojnikow nadběhował. Skónčnje so jimaj poradźi roznjemdrjeneho muža přemóc. Přiwšěm staj so lochko zraniłoj. Skućićel ma nětko z chłostanskim jednanjom ličić.
Bydlenje w Berlinje přepytali
Drježdźany (dpa/SN). W padźe zhubjenych drohoćinkow Drježdźanskeho Zeleneho wjelba je policija dźensa rano w jednym Berlinskim bydlenju za slědami pytała. Zawěsćene dokumenty maja nětko wuhódnoćić, zdźěli Drježdźanske statne rěčnistwo. Pytaneho pjateho podhladneho njejsu hišće namakali. Tamni štyrjo su w přepytowanskej jatbje.
Lockdown hišće wótriši
London (dpa/SN). Razantnje stupacych ličbow koronainfekcije we Wulkej Britaniskej dla je tamniše knježerstwo naprawy zaso raznje přiwótřiło. „Dyrbimy znowa do lockdowna“, zdźěli wčera wječor premierminister kraja Boris Johnson. Ludźo smědźa swoje bydlenja jenož hišće w najnuznišich padach wopušćić, šule wostanu zawrjene. Naprawy płaća hač dosrjedź februara, dokelž bě Wulka Britaniska minjene dny dale a wjace nowonatyknjenjow zwěsćiła. Wčera bě to 59 000 nowych padow. Wina na tym je mutacija wirusa.
Rozsud tola hakle jutře
Najebać namołwy, so toho wzdać, dale wjele dnjowych turistow do ...
Wokrjes Budyšin ma dale a staršich wobydlerjow
Budyšin (SN). Mamy dale a wjac wuměnkarjow, ale je tež dosć bydlenskich móžnosćow za nich? W Budyskim wokrjesu móhła ličba ludźi, kotřiž su starši hač 65 lět, hač do lěta 2035 na 91 300 rozrosć. Jich podźěl na wobydlerstwje wučinja potom 38 procentow, štož je porno lětu 2017 ze 27 procentami jasne stopnjowanje. Na tónle fakt skedźbnja industrijne dźěłarnistwo twarstwo-agrar-wobswět (IG Bau), powołace so na demografisku prognozu instituta za regionalne hospodarstwo CIMA. Dźěłarnistwo starosći so přemało bydlenjow dla, kotrež su wuměnkarjam wotpowědnje wuhotowane. „Lift město schodu, šěrše durje za jězdne stoły a rolatory kaž tež bjezbarjernu dušu ma jenož mało bydlenjow we wokrjesu. Za razantnje přiběracu staršu generaciju njeje to optimalne, štož ma so změnić“, rozłožuje předsyda IG Bau wuchodneje Sakskeje Peter Schubert, kiž ma to za demografisku nuznosć. Tak měli přidatne bydlenja z wotpowědnymi wuměnjenjemi twarić a hižo wobstejace přetwarić. „Jeli staršu ludnosć bóle njewobkedźbujemy, hrozy nam za něšto lět bydlenska nuza.
Hotelowa branša před wulkej změnu
Frankfurt n. M. (dpa/SN). Mnohe zarjadowanja a wiki su wotprajene a tójšto akcijow nětko online přewjeduja. W času koronapandemije so wjele měnja. Ludźo wot doma dźěłaja a někotre firmy swojich sobudźěłaćerjow hižo na słužbne jězby njesćelu. To ma sćěhi na hotelowu branšu. Tak njepobrachuja jenož turisća, ale předewšěm tež wobchodnicy. Města kaž Frankfurt nad Mohanom, Lipsk abo Berlin, hdźež kóžde lěto wjacore wiki zarjaduja, su wot krizy wosebje potrjechene. „Hotelowa branša steji před wulkej změnu. Ličimy z tym, zo njebudźe po pandemiji dźěl kongresow, wikow abo zjězdow hižo na jednym městnje, ale online přewjedźeny“, rozłožuje Tobias Warnecke z němskeho zwjazka hotelow IHA. „Tak kaž w lěće 2019 hižo ženje wjac njebudźe.“
Něhdźe 25 procentow němskeho turizma su dotal stajnje słužbne jězby wučinjeli. Někotre hotele su za wobchodniski wobłuk hišće wotewrjene, ale su tuchwilu jenož hač do jědnaće procentow wućežene.
Wobmjezowanja maja dale płaćić
Kultusowi ministrojo so na plan dojednali – postupowanje pak rozdźělne
Berlin/Drježdźany (dpa/SN). Wobydlerjo w Němskej maja so na podlěšenje korona-naprawow hač do kónca januara nastajić. Hižo na wčerawšej konferency kultusowych ministrow zwjazkowych krajow bě wo tym rěč, zo maja šule najprjedy zawrjene wostać. Přiwšěm dojednachu so na třischodźenkowy plan, po kotrymž maja so šulerjo zaso do kubłanišćow nawróćić. W prěnim schodźenku ći z rjadownjow hač do 6. lětnika do šule přińdu. Tamni maja dale doma wuknyć. Po tym slěduje wučba w změnach, při čimž rjadownje na skupiny dźělene wotměnjejo w šuli a doma wuknu. Hakle pozdźišo maja so wšitke dźěći a młodostni zaso do šule nawróćić. Kak jednotliwe zwjazkowe kraje plan zwoprawdźa, wone same rozsudźa. Wšako je infekciske połoženje rozdźělne. Sakski ministerski prezident Michael Kretschmer (CDU) pak njewidźi tuchwilu hišće žanu móžnosć, wobmjezowanja powólnić. Swobodny stat je hladajo na ličbu nowoinfekcijow dale hotspot w Němskej.
To a tamne (05.01.21)
Mobilna sawna na kromje puća je policajske zasadźenje wuskutkowała. Swědcy w saarlandskim Wallerfangenje běchu pozdatnje naheho muža w sudźe wuhladali a so na tym postorkowali. Zawołana policija pak njemóžeše žane přeńdźenje zwěsćić, sud bě na připowěšaku awta derje připrawjeny a muž w kupanskich cholowčkach. Sawna pod hołym njebjom njeje zakazana. Wón njetrjeba tuž ze žanymi konsekwencami ličić.
Dotal njeznaty dobyćer lota z Badensko-Württembergskeje je swoju poslednju šansu zapasł so přizjewić a sej 11,3 miliony eurow hódne dobyće wotewzać. Tele pjenjezy du nětko do hornca wosebitych wulosowanjow. Hižo wot apryla 2017 běchu za dobyćerjom pytali. Najebać prawidłowne namołwy njeje so nichtó přizjewił. Tajki pad dotal na juhozapadźe Němskeje hišće dožiwili njejsu.
Čehodla zwonja silwester zwony?
Augsburg (B/SN). W silwesterskej nocy witaja zwony po wšěm swěće nowe lěto. Zwuk zwonow ludźi zdawna wobkuzłuje. Při zwonjenju rozeznawatej so swětne a cyrkwinske zwonjenje. Silwesterske zwonjenje jako swětne pochadźa ze srjedźowěka, jako wjetšina ludźi časniki njeměješe. Najćeši zwón w Němskej je Pětrowy zwón, waži 24 tonow a wisa w Kölnskej tachantskej cyrkwi. Tohorunja wisa tam najwjetši machotacy (schwingend) zwón „Dicke Pitter“. Wón bu 1923 kidany a ma rozměr 3,22 metrow. Najstarši zwón Němskeje je Lullusowy zwón w zwóńcy klóšterskeje ruiny w Bad Hersfeldźe. Wón pochadźa z lěta 1038. Najwjetši zwón swěta wisa w Myanmaru a je 3,70 metrow wysoki, ma přeměr 5 metrow a waži 87 tonow.
Kölnski signal je „zahubny“
