Pjećina přećiwo šćěpjenju
Kak dale ze šulemi?
Přećiwo wirusej šćěpić započeli
Drježdźany (dpa/SN). We wšitkich 16 zwjazkowych krajach Němskeje su wčera započeli, ludźi přećiwo koronawirusej šćěpić. K zahajenju akcije w Sakskej je ministerka za strowotnistwo Petra Köpping (SPD) hladarnju w Lichtentanne w Zwickauskim wokrjesu wopytała. Tam su 85lětnu wobydlerku jako prěnju šćěpili. Köpping mjenowaše seniorku „přikład“ a šćěpjenja „škričku nadźije“. Jej je wažne, zo móža zamołwići nětko „aktiwnje přećiwo wirusej“ postupować. „Nětko mamy skónčnje móžnosć, něšto činić.“
K zahajenju šćěpjenja ma Sakska najprjedy raz 10 000 dozow seruma k dispoziciji. Dalšich 24 000 dozow wočakuja přichodne dny. Šćěpiwo běchu sobotu pod škitom policije do tajneho składa w swobodnym staće dowjezli.
Tež w susodnej Čěskej a Pólskej su wčera přećiwo koronawirusej šćěpić započeli. Čěski ministerski prezident Andrej Babiš je so před kamerami we wojerskej chorowni šćěpić dał. W Pólskej dósta chorobna sotra jedneje z Waršawskich chorownjow prěnju injekciju.
Hospodarstwo: Budźe lěpje
Kedźbliwy optimizm w najwjetšim dźělu branšow za nowe lěto 2021
Köln/Drježdźany (dpa/SN). W hospodarstwje Němskeje knježi po masiwnych konjunkturnych stratach koronakrizy dla hladajo na přichodne lěto zaso kedźbliwy optimizm. Po woprašowanju Instituta němskeho hospodarstwa wočakuja zamołwići w 26 z cyłkownje 43 branšow klětu lěpše wuwiće hospodarstwa hač 2020. Nadźijepołne wuhlady pak njewoznamjenja, zo móža so předewzaća a cyłe branše na niwow wróćić, kiž knježeše do wudyrjenja krizy, zdźěla dźěłodawarjam přichileny institut.
Dołhi puć k normaliće
Předewzaćam pomoc wupłaćili
Podstupim (dpa/SN). Zo móhli sćěhi zawrjenjow koronapandemije dla lěpje zmištrować, je Inwesticiska krajna banka Braniborskeje (ILB) wjace hač 6 000 předewzaćelam w kraju podpěru wupłaćiła. Mjez nimi je 1 500 tak mjenowanych solo-samostatnych, kotřiž dóstachu hač do 5 000 eurow. Podźěl nowemberskeje pomocy dósta nimo toho 4 300 předewzaćelow, kotřiž běchu próstwu wo podpěru přez portal Zwjazka wotedali.
Cyłkownje je ILB 33 milionow eurow na dobro samostatnych a předewzaćelow přepokazała, najwjace 10 000 eurow. Mjeztym su sumu na 50 000 eurow zwyšili a chcedźa ju woprawnjenym firmam dopłaćić, z čimž chcedźa hišće lětsa započeć. Spočatk januara budźe wobdźěłanje tež internetnje móžne. Šef předsydstwa banki Tillmann Stenger prosy předewzaća wo sćerpnosć. Ručež Zwjazk techniske wuměnjenja wutwori, chcedźa nakopjene próstwy spěšnje wotdźěłać.
Tak mjenowanu nowembersku pomoc wupłaća předewšěm gastronomiskim zawodam, kotrež dyrbjachu zawrěć. Jim zarunaja 75 procentow wobrota, kotryž mějachu w nowembru 2019.
To a tamne (28.12.20)
Pilneho „hodowneho palčika“ su policisća w braniborskim Werderu nad Habolu patoržicu wječor wustróžili. Wobydlerka bě zastojnikow alarmowała, dokelž bě w parkowacym transporteru elektriski šrubowak słyšała. Tukajo na padustwo chwatachu zastojnicy k městnu a nańdźechu w awće 27lětneho, kiž w poslednim wokomiku dary za swójbu pasleše. Zasadźenje skónči so z posměwkom.
Dźesaćlětny hólc je prěni dźeń hód z awtom přiwuzneho po Rotterdamje jězdźił, doniž jeho policist njezadźerža. Zastojnikej bě mały šofer napadnył, kotrehož hłowa lědma nad wodźidło sahaše. Wobsedźer awta na pódlanskim sedle rozłoži, zo je hólc přez hody z Rumunskeje přijěł. Dokelž hižo derje z awtom jědźe, bě wón dźěsću jězbu po měsće popřał. Policija piše, zo so „ničemu wjace njedźiwa“ a zo płaći akcija wobsedźerja 280 eurow.
Trump dojednanje blokuje
Washington (dpa/SN). Amtěrowacy prezident USA Donald Trump je sej polěpšenje na z wulkej wjetšinu w kongresu wobzamknjenym konjunkturnym pakeće koronapandemije dla žadał. Schwalene naprawy mjenowaše wón „hańbu“ a hrožeše, zo zrěčenje we wobjimje 900 miliardow dolarow njepodpisa. Jónkrótne wupłaćenje 600 dolarow na wosobu měło so na 2 000 dolarow zwyšić, sej Trump žadaše. Republikanojo a demokraća běchu so po wobćežnych jednanjach na konjunkturny paket dojednali.
Šoferojo přiběracy hněwni
Dover (dpa/SN). W jendźelskim přistawnym měsće Doveru je k rozestajenjam mjez čakacymi šoferami nakładnych awtow a policiju dóšło. Hněwni šoferojo běchu zastojnikow wuhwizdali a do nich storkali, medije rozprawjeja. Do toho bě Francoska Wulkej Britaniskej zdźěliła, zo smědźa nakładne awta zaso do Francoskej přijěć, maja-li šoferojo negatiwny test na koronu při sebi. Francoska bě njedźelu noweje formy koronawirusa w Jendźelskej dla mjezy zawrěła.
Žane přechwatane šćěpjenje
Něhdźe 50 000 protestowacych je sej wčera w armenskej stolicy ...
Přidatne pjenjezy za kulturu
Berlin (SN). K zesylnjenju kulturneho spěchowanja wot skónčenja zmilinjenja brunicy potrjechenych kónčin chce zwjazkowe knježerstwo 20 wot Zwjazka spěchowanym institucijam a projektam klětu wjace hač 21 milionow eurow přidatnje přewostajić. Hač do lěta 2038 su cyłkownje wjace hač 200 milionow eurow za spěchowanje cyłostatnje wuznamnych předewzaćow we wobłuku zakonja k sylnjenju strukturow we wuhlowych kónčinach zaplanowali.
K tomu rjekny kulturna statna sekretarka Monika Grütters (CDU): „Při kóždej wuspěšnej strukturnej změnje hraje wobchadźenje z kulturu rozsudnu rólu. Wona je wažny faktor za region, přinošuje k žiwjenskej kwaliće a polěkuje regionalnej identiće w časach přewróta.“ Ministerce je wažne, zo wot wšeho spočatka sylnje do kulturnych poskitkow inwestuja. „Tohodla je kulturne spěchowanje wažny wobstatk zakonja k sylnjenju strukturow we wuhlowych kónčinach.“
