Berlin (dpa/SN). Zwjazkowy sejm je dźensa poslednje lětuše wuradźowanja zahajił. K zahajenju je zwjazkowa kanclerka Angela Merkel (CDU) na prašenja zapósłancow wotmołwjała. Centralna tema bě kurs zwjazkoweho knježerstwa w aktualnej koronapandemiji. Wot dźensnišeho płaća nowe krute wobmjezowanja zjawneho žiwjenja korony dla. Na próstwu CDU/CSU a SPD zaběraše so zwjazkowy sejm tež z temu, kak narodnu strategiju šćěpjenja zwoprawdźić. Prěni serum přećiwo koronawirusej móhł hišće do hód cyłoeuropske přizwolenje dóstać.

Dalša tema bě dawkowa politika jako sćěh pandemije. AfD sej žada, zo móže kóždy, kiž doma dźěła, nastawace kóšty njeběrokratisce wot dawkow wotćahnyć.

Hrajkacej so kóčce stej při šćěkanju mylnje kuchinske kachle zaswěćiłoj a tak ­woheń zawiniłoj. 33lětny wobsedźer bě bydlenje w Zwickauwje wopušćił a kóčce do kuchnje zawrěł. Na kachlach stejacy plastowy koš a nowiny so zapalichu. Pobrachowaceho kislika dla njemóžeše so woheń „na zbožo“ na cyłe bydlenje wupřestrěć. Za wobě kóčce pak bě woheń tragiski, dokelž stej w nim zahinyłoj. W bydlenju nasta škoda 20 000 eurow.

Nowy koncept wubědźowanja „Miss Germany“ žněje dobry wothłós. Na wšě 15 000 žonow je so za nje přizjewiło. 32 z nich na internetnej stronje wo swojich dóńtach rozprawja, wo chorosćach, wumocowanju abo depresijach. Po měnjenju organizatorow njejsu wubědźowanja rjanolinkow hižo načasne. Dźensa pytaja za žonami, kotrež móža z přikładom być.

Strasbourg (SN/JaW). W Europskim parlamenće su wčera wobydlersku iniciatiwu Minority SafePack (MSPI) Federalistiskeje unije europskich narodnych mjeńšin (FUEN) wobjednali. Wjac hač 20 politikarjow je so wuprajiło, mjez nimi tež prezident FUEN a zapósłanc EU-parlamenta Loránt Vincze. Wjetšina rěčeše za přiwzaće MSPI. Tatjana Ždanoka apelowaše: „Nimamy prawo, milion wobydlerjow EU přesłapić.“ Předsydu Domowiny Dawida Statnika přihłosowace přinoški pozbudźeja. „Politika na dobro mjeńšin njeje hižo eksotiski připlack, ale słuša mjeztym k ‚mainstreamej‘ našeho kontinenta“, wón na naprašowanje zdźěli. „Za nas je to tež wuraz solidarity z mjeńšinami w druhich krajach, kotrymž so špatnišo dźe a kotrež maja mjenje prawow hač my w Němskej.“ Za płódnu ma debatu předsydka rady Załožby za serbski lud Susann Šenkec. „Wosebje je mi napadnyło, zo zarjaduja naležnosće mjeńšin do wjetšeho towaršnostneho konteksta wo přichodźe Europy, kaž španiski zapósłanc Esteban Gonzáles Pons jadriwje zwurazni: ‚Njedowolmy nacionalistam, zo nam wotrjeknu wuspěch, być Europjenjo.

Berlin (dpa/SN). W Berlinje zajateho podhladneho w padźe spektakularneho rubježnistwa w Drježdźanskim Zelenym wjelbje chcychu dźensa do Drježdźan přepołožić, zo bychu jeho sudnikej předstajili, kaž statne rěčnistwo zdźěli. Prawdźepodobnje sćele sudnik 21lětneho do přepytowanskeje jatby. Podhladny je jedyn z dwójnikow arabskeho swójbneho clana, kotrajž běštaj při raciji policije 17. nowembra ćeknyłoj. Wčera wječor jeho specielne komando policije zaja.

Biden namołwja Trumpa

Washington (dpa/SN). Přichodny prezident USA Joe Biden je wotwoleneho mějićela zastojnstwa Donalda Trumpa namołwił, wólbnu poražku přiznać. Tak pokaza na to, zo su jemu wólbni mužojo zwjazkowych statow 306 ze wšěch 538 hłosow přiličili. Trěbnych bě 270 hłosow. Mjeztym staj ruski prezident Wladimir Putin a pólski prezident Andrzej Duda Bidenej jako nowemu prezidentej USA gratulowałoj a dobre styki poskićiłoj.

Přewostaja darmotne nahubniki