Berlin (dpa/SN). Prezencnu wučbu w šulach dyrbjeli po měnjenju zwjazka wučerjow realnych šulow koronakrizy dla po cyłej Němskej přetorhnyć. „Dyrbjeli spěšnje a jasnje rozsudźić. Pod tajkimi wuměnjenjemi měli šulerjo zaso doma wuknyć“, rjekny předsyda zwjazka Jürgen Böhm wčera nowinarjam. „Nětko so wjeći, zo su kraje a kultusowe zarjady jasne ličby infekcijow a incidencow ignorowali a prezencnu wučbu na kóždy pad přetłóčić chcyli“, wón doda. Štóž wědomostne dopóznaća a poručenja chutnje njebjerje, je sobu wina na rozpřestrěću pandemije a tak na podlěšenju a pohłubšenju krizy, Jürgen Böhm wuzběhny.
Kultusowi ministrojo krajow běchu po lětnich prózdninach hladajo na nazhonjenje wokoło zawrjenych šulow stajnje zaso potwjerdźeli, zo chcyli prezencnu wučbu dalokož móžno zwoprawdźić.
Měnjo, zo ma dźiwje swinjo před sobu, je hajnik mylnje na małeho islandskeho konja třělił a jeho ćežko zranił. 34lětny bě w lěsu njedaloko badensko-württembergskeho Ravensburga črjódu dźiwich swini widźał. Ze specialnej kameru wuhlada wón něšto pozdźišo swinje na kromje lěsa a z něhdźe 80 metrow na nje třěleše. Jako so zranjenemu zwěrjeću bližeše, dyrbješe spóznać, zo bě na konje třělał. Ponyja su w zwěrjećej klinice operowali, přećiwo hajnikej nětko přepytuja.
Po namakanju wjacorych mysterioznych monolitow su tele dny tež njedaloko hrodu Neuschwanstein w bayerskim Allgäuju spodźiwnu stelu našli. Štó je něhdźe dwaj metraj wysoki metalowy stołp na polo stajił, dotal njewědźa. Žona bě jón na wuchodźowanju wuhladała. Zamołwići za turizm so boja, zo so wćipni nětko we wulkej ličbje nawala.
Berlin (dpa/SN). Bayerski ministerski prezident Markus Söder (CSU) wupraja so za „dospołny lockdown“ za čas mjez hodami a 10. januarom. W tym času móhli „wšitko zawrěć“ a w zawodach dowol zarjadować, rjekny wón wčera w telewiziji ZDF. Tak bychu wšitcy nimale tři tydźenje měli, zo móhli kontakty redukować. Lěpši čas hač tón mjez hodami a 10. januarom za lockdown „cyłe lěto wjace njezmějemy“, Söder podšmórny.
Racija přećiwo clanam
Berlin (dpa/SN). Z wulkej raciju je policija w Berlinje a Hamburgu přećiwo organizowanej kriminaliće w arabskich wulkoswójbach postupowała. Cyłkownje přepytachu dźensa rano 27 bydlenjow a zajachu třoch podhladnych, kaž statne rěčnistwo zdźěli. Při tym dźe tež wo styki clanow k syćam rockerow. Něhdźe 500 policistow bě zasadźenych, mjez nimi specialne komando SEK. Mjez druhim dźe wo płokanje pjenjez w zwisku z kupowanjom a předawanjom domow.
Daty za serum kradnyli
Berlin (dpa/SN). Nutřkowni ministrojo Zwjazka a zwjazkowych krajow su dźensa wo móžnym wotsunjenju syriskich ćěkancow do jich domizny wuradźowali. Wot CDU/CSU nawjedowane zwjazkowe kraje běchu hižo do posedźenja signalizowali, zo nochcedźa wot lěta 2012 płaćiwy generelny zakaz wotsunjenja wo dalše poł lěta podlěšić. Wot SPD nawjedowane kraje so tomu spjećuja.
Dalši dypk dnjoweho porjada bě wobchadźenje z ekstremistiskimi tendencami w hibanju „prěkimyslerjow“, kotřiž so wobmjezowanjam koronapandemije dla spjećuja. Badensko-württembergski wustawoškit po swójskich informacijach „ekstremistiske prócowanja“ wobkedźbuje. Tež wo ekstremizmje w rjadach policije chcychu dźensa rěčeć. Nutřkowni ministrojo so dwójce wob lěto schadźuja. Koronakrizy dla je dźensniša konferenca w dalokej měrje wirtuelna.
Drježdźany (dpa/SN). Sakski wustawoškitny zarjad chce po informacijach medijow krajny zwjazk AfD sylnišo wobkedźbować a jako podhladny pad zastopnjować. Po rešeršach dźenika Süddeutsche Zeitung kaž tež sćelakow NDR a WDR je tajna słužba nutřkowneho ministra Rolanda Wöllera (CDU) wo tym informowała. Wotpowědne pruwowanje zarjada je wotzamknjene a ministerstwu předleži. Nětko je móžno AfD ze srědkami tajnych słužbow wobkedźbować. Jedna z přičin su kontakty čłonow strony k prawicarskoekstremistiskej scenje.
Sakski krajny zarjad za wustawoškit na naprašowanje medijow njereaguje. Politikarka Lěwicy Kerstin Köditz, znajerka prawicarskeje sceny, njeje překwapjena. „To by so dawno stać dyrbjało“, rjekny wona powěsćerni dpa. Najpozdźišo w septembru 2018 by načasu było so stronje AfD bóle wěnować. Tehdy su jeje funkcionarojo zhromadnje z neonacijemi po Kamjenicy pochodowali, po tym zo bě tam Němc při rozestajenju z ćěkancami žiwjenje přisadźił. „AfD njeje so nihdy wot prawicarskich ekstremistow jasnje wotmjezowała. Dwě lěće smy nětko zhubili.“
Z dźećelowymi łopješkami spyta japanski šofer taksija swojich pasažěrow zawjeselić. Pyta tuž štyriłopješkaty dźećel, kaž 69lětny Kenji Tsutsui nowinam praji. Při tym sam w róžojtym połoženju njeje. Wot spočatka koronakrizy je jeho wobrot drastisce woteběrał. Ludźo, kotřiž z nim hišće sobu jězdźa, su zwjetša poraženi a rěča jenož wo koronje. Dźećelowe łopješka pyta Tsutsui na kromje parkowanišća, hdźež jeho taksi trójce wob dźeń desinficěruja.
Z wulkim hamorom je hněwny wodźer awta w Saarbrückenje spytał błyskačowy připowěšak rozbić. Jako swědcy muža wčera wječor narěčachu, tón zhromadnje ze žonu z awtom ćekny, kotrež njedaloko wottam steješe. Błyskač je po informacijach policije wonkownje wobškodźeny, ale dale dźěłakmany. Hač je nastroj roznjemdrjeneho šofera „při dźěle“ fotografował, njemóže policija rjec.
Berlin (dpa/SN). Dołho wočakowany serum přećiwo koronawirusej chcedźa zdźěla w kasernach Zwjazkoweje wobory składować. Wotpowědna próstwa wo pomoc mjeztym předleži, zdźěli zakitowanska ministerka Annegret Kramp-Karrenbauer (CDU) nowinarjam. Kaserny chcedźa pak jenož wužiwać, hdyž maja to za zmysłapołne. Nimo toho je wójsko dalšu pomoc při šćěpjenju poskićiło. W boju přećiwo pandemiji je tuchwilu 9 000 wojakow zasadźenych.
Trump poražku poćerpjeł
Washington (dpa/SN). Prawiznicy Donalda Trumpa su w juristiskim boju přećiwo přěhratym prezidentskim wólbam dalšu poražku poćerpjeli, tónkróć před najwyšim sudnistwom. Supreme Court we Washingtonje je próstwu wotpokazał, wuslědk wólbow w zwjazkowym staće Pennsylvania zběhnyć. Tež tam bě republikan swojemu demokratiskemu kontrahentej Joewej Bidenej podležał. Wot 3. nowembra Trump twjerdźi, zo su jemu wólbne dobyće přez masiwne falšowanje wzali. Dopokazy wón žane nima.
Pytataj za rozrisanjom