Pochod zakazał

Montag, 09. November 2020 geschrieben von:
Waršawa (dpa/SN). Wyši měšćanosta Waršawy Rafał Trzaskowski je na Dnju njewotwisnosće Pólskeje, 11. nowembra, planowany pochod prawicarskich organizacijow koronapandemije dla zakazał. Strowotniski zarjad města so boji, zo móhła demonstracija dalšemu rozšěrjenju koronawirusa polěkować, rěka w pjatkownej zdźělence Waršawskeje radnicy. Nimo toho by tuchwilny zakaz zhromadźiznow raniła. Pandemije dla su w Pólskej tuchwilu jeno zarjadowanja z najwjace pjeć wobdźělnikami dowolene. Minjene lěta bě na „Pochodach njewotwisnosće“ stajnje zaso k namócnosćam ze stron ­prawicarjow a nacionalistow dochadźało. Tući chcedźa so tuž k „spontanym“ ­akcijam we Waršawje zhromadźić.

Žadaja sej wotstup ministra

Montag, 09. November 2020 geschrieben von:

Lipsk (dpa/SN). Młodźinskej organizaciji Lěwicy a FDP w Sakskej žadatej sej konsekwency po namócnosćach při demonstraciji přećiwo wobmjezowanjam koronawirusa dla w Lipsku. „Sobotu su žurnalistow po měsće ćěrili a strowotu nas wšěch wohroželi. K namocy zwólniwi radikalni prawicarjo móžachu so swobodnje po Lipsku pohibować. Sym zludany“, piše Paul Podbielski w mjenje sakskeje Lěwicarskeje młodźiny. Wón wumjetuje policiji zaprajenje, kotrež dyrbjało konsekwency měć.

Młodźi liberalni Sakskeje žadaja sej wotstup nutřkowneho ministra Rolanda Wöllera (CDU). „W jeho wuprajenjach na nowinarskej konferency njebě žana zwólniwosć spóznajomna, za dospołnje zwrěšćene policajske zasadźenje zamołwitosć přewzać“, rěka w zdźělence. Sobotu bě znajmjeńša 20 000 ludźi přećiwo naprawam koronawirusa dla demonstrowało. Lědma štó wužiwaše nahubnik. Policija njebě personelnje kmana prawidła hygieny přesadźić. Na kromje demonstracije dóńdźe k namócnosćam.

Nadźija na nowy započatk

Montag, 09. November 2020 geschrieben von:

Wolóženje a zbožopřeća po wólbnym dobyću Joewa Bidena w USA

Berlin/Washington (dpa/SN). Wólbne dobyće demokratiskeho prezidentskeho kandidata USA Joewa Bidena zwjazuje zwjazkowa kanclerka Angela Merkel (CDU) z wulkej nadźiju, zo so poměr mjez EU a USA zaso polěpši. To rjekny wona dźensa na krótkodobnje zwołanej nowinarskej konferency. „Naše transatlantiske přećelstwo je njeparujomne, chcemy-li wulke wužadanja časa zmištrować“, Merkel potwjerdźi. Wona je sej wěsta, zo je nowy prezident Joe Biden kmany mjezynarodne poćahi, kotrež běchu pod dotalnym prezidentom Donaldom Trumpom chětro ćerpjeli, zaso na nowy niwow pozběhnyć. Němska chcyła tomu poboku swojich europskich zwjazkarjow po swojich mocach přinošować.

77lětny Biden bě mjez druhim připowědźił, zo chcył Pariskemu zrěčenju wo škiće klimy, kotrež bě Trump jednostronsce wupowědźił, zaso přistupić. We wólbnym boju bě wón přilubił, zo chcył wustork klimje škodźacych płunow w USA hač do lěta 2050 dospołnje zastajić. USA su po Chinje druhi najwjetši zanjerodźer powětra po wšěm swěće.

Koronje so to lubi

Montag, 09. November 2020 geschrieben von:
Demonstracije su tuchwilu po wšěm swěće chětro en vogue. Mjeztym zo so pro­testy w Americe a Němskej swobodu ­měnjenja aktiwnje wukonjejo naposledk přećiwo tomu zakładnemu prawu měrja, žadaja sej w Pólskej, Hongkongu a Běłoruskej – přećelnje a indirektnje ze słowami Willyja Brandta sformulowane –, zwažić sej mjenje awtokratije. Trochu njepřewidniše je połoženje w Georgiskej, hdźež dwěluja na wuslědku wólbow. Hinak hač w USA wšak su wobkedźbowarjo Konferency za wěstotu a zhromadne dźěło w Europje tam znajmjeńša „njeprawidłownosće“ zwěsćili. Kak skomolena demokratija – kóždy hłós liči! – w mjenowanych krajach je (a dalokož směmy wotpowědne politiske poměry scyła tak pomjenować), spó­znawamy na stopnju nałožowaneje statneje namocy přećiwo demonstrantam. Akterej, kotremuž so wšo to najbóle spo­doba, su hranicy a měnjenja smorže. Komentar korony nastupajo ludowe masy wšak rěka: „I like!“ Bosćan Nawka

To a tamne (09.11.20)

Montag, 09. November 2020 geschrieben von:

Prěni króć digitalnje zahajić chcedźa lětušu sezonu karnewalistow koronapandemije dla. Zajutřišim, 11. nowembra, w 11.11 hodź chce Zwjazk karnewalistow Němskeje sezonu oficialnje startować. „Chcemy w tym času najebać wirus prezentni być a ludźom wjeselo do bydlenjow přinjesć“, zwjazk informuje. Internetny livestream poskići potom hudźbne wideja a postrowy politikarjow.

Črjopy a hotowy chaos zawostajiła je šoferka awta sobotu w Bramsche w Osna­brückskim wokrjesu, po tym zo bě pedalej za płun a borzdźenje zaměniła. 53lětna zrazy z wotmachom do wukładneho wokna paslenskeho wobchoda, hdźež je tak wjacore regale z dekoraciskim materialom spowalała. Ani žona ani sobu jěducy wnučk so njezraništaj. Parkowa­nišćo wona poprawom znaje: W domje, do kotrehož bě zrazyła, dźě sama bydli.

Spahn: Hórka medicina

Freitag, 06. November 2020 geschrieben von:

Berlin (dpa/SN). Němski zwjazkowy minister za strowotnistwo Jens Spahn je hladajo na dale přiběrace ličby natyknjenjow z koronawirusom cyłoněmske wobmjezowanja zjawneho žiwjenja zakitował. To je znowa „hórka medicina“ statysacam ludźi, kotraž pak je trěbna, rjekny politikar CDU dźensa w zwjazkowym sejmje. „Hdyž su intensiwne stacije přepjelnjene, je přepozdźe. W Němskej su w běhu 24 hodźin rekordne 21 506 nowych koronainfekcijow zličili.

Namócne protesty korony dla

Ljubljana (dpa/SN). Z wodomjetakami a sylzopłunom je policija w słowjenskej stolicy Ljubljanje demonstraciju přećiwo naprawam knježerstwa w boju přećiwo koronawirusej rozpušćiła. Do toho běchu so předewšěm lěwicarscy młodostni před twarjenjom parlamenta zhromadźili, hdźež mjetachu kamjenje a praskotaki na policistow, kaž powěsćernja STA rozprawja. K demonstracijam přećiwo najnowšim přiwótřenym naprawam je tež w Italskej a Wulkej Britaniskej dóšło.

Opozicija namołwja wójsko

Za wyši rozhłosowy popłatk hłosowali

Freitag, 06. November 2020 geschrieben von:

Drježdźany (dpa/SN). Sakski krajny sejm je wčera po kontrowersnej debaće přihłosował, rozhłosowy popłatk zwyšić. Parlament rozsudźi so za to z hłosami CDU, Zelenych a SPD. Lěwica so hłosa wzda, AfD bě přećiwo tomu. Tež jedyn zapósłanc z rjadow CDU hłosowaše z „ně“. Rozhłosowy popłatk chcedźa wot 1. januara 2021 wo 86 centow na potom 18,36 eurow wob měsac zwyšić. Runje tak bě to komisija fachowcow namjetowała. Wšitke krajne sejmy Němskeje dyrbja tomu přihłosować. W Saksko-Anhaltskej pak njeje dotal za to žana wjetšina wotwidźeć.

Wothłosowanje bě přewodźane wot horceje debaty. Za medije zamołwity šef statneje kenclije Oliver Schenk (CDU) rěčeše wo „moderatnym zwyšenju“ a widźeše za to runje nětko dobre přičiny, zjawno-prawniski rozhłós skrućić. „Runje w času, hdyž so w koronapandemiji spodźiwne teorije a wopačnosće šěrja, trjebaja ludźo poskitk, kotremuž móža dowěrić“, Schenk wuzběhny.

Trump ma so hižo za dobyćerja

Freitag, 06. November 2020 geschrieben von:

Washington (dpa/SN). Prezident USA Donald Trump je připowědźił, ze sudniskimi skóržbami so masiwnje přećiwo wólbnej poražce wobarać. „Njemóžemy dopušćić, zo nam wólby na te wašnje kradnu“, rjekny Trump w Běłym domje. Znowa rěčeše wo wólbnym wobšudni­stwje, bjeztoho zo by dopokazy předpołožił. Wšako bě wón twjerdźił, zo by wólby „z lochkosću“ dobył, bychu-li so „legitimnje“ wotměli. Najebać to, zo njejsu wuslědki w někotrych statach hišće wozjewili, ma so Trump za dobyćerja.

We wjacorych statach pomocnicy hłosy dale wuličeja. W Pennsylvaniji a Georgiji je kontrahent, demokrat Joe Biden, porno Trumpej dale nachwatać móhł, po tym zo běchu tam listowe wólbne podłožki wuličili. By-li Biden Pennsylvaniju za sebje zdobył, by so wón z wjace hač trěbnymi 270 wólbnymi mužemi přećiwo Trumpej přesadźił. Mjeztym dochadźa po cyłym kraju k demonstracijam přiwisnikow a přećiwnikow Trumpa. ­Toho syn bě jeho namołwił, „totalnu wójnu“ wo wólby zahajić.

Škoda hižo hoberska

Freitag, 06. November 2020 geschrieben von:
Zo budźe prezident USA Donald Trump hladajo na hrožacu wólbnu poražku tak agresiwnje a njewěcownje reagować, z tym móžachmy poprawom hižo ličić. Stajnje zaso bě wón do wólbow před móžnym jebanstwom warnował. Skónčnje tež zabyli njejsmy, što bě wón před štyrjomi lětami swojej kontrahentce Hillary Clinton w telewizijnej debaće rjekł: „Akceptuju wuslědk wólbow, jelizo dobudu.“ Mjeztym je nimale wšojedne, štó na kóncu jako přichodny prezident do Běłeho domu we Washingtonje zaćehnje. Škoda, kotruž je nětčiši ze swojej šćuwańcu a ze swojimi łžemi w ameriskej towaršnosći načinił, je tak hoberska, zo žane štyri lěta njedosahaja ju zaso sporjedźeć. Tamniša towaršnosć je dospołnje pačena a – to najhórše – znjepřećelena. Hišće su zražki mjez přiwisnikami a přećiwnikami Trumpa jenož werbalneho razu. Što pak so stanje, hdyž přiwisnicy namołwu jeho syna k „totalnej wójnje“ sćěhuja, sej čłowjek při najlěpšej woli předstajić nochce. Marko Wjeńka

Söder a Babiš staj sej přezjednaj

Freitag, 06. November 2020 geschrieben von:

Mnichow (dpa/SN). Bayerski ministerski prezident Markus Söder (CSU) a čěski ministerski prezident Andrej Babiš chcetaj mjezu tež při dale přiběracej ličbje natyknjenjow z koronawirusom wotewrjenu wostajić. „Mjezu zawrěć njeby w boju přećiwo pandemiji wjele wunjesło, by pak razne negatiwne wuskutki měło“, rjekny Söder w Mnichowje po widejowej konferency z Babišom. Podłu wobeju bokow statneje hranicy płaća mjeztym samsne škitne prawidła kaž nahubnik wužiwać a wotstawk dodźeržeć. Tak by zawrjena mjeza předewšěm hospodarstwo, posłužby a transport tworow haćiła. Tež medicinske zastaranje by potrjechene było, kaž Markus Söder argumentowaše. W bayerskich hladarnjach dźěła wosebje wjele čěskich dojězdźowarjow.

Söder potwjerdźi Babišej swój dotalny poskitk, sto łožow za čěskich pacientow rezerwować. Tež Babiš wuznam mjezsobneje pomocy wuzběhny: „Hdyž němske hospodarstwo zwrěšći, tež naše hospodarstwo njepřežiwi.“ Wobaj rěčeštaj tuž runje tak wo mjezu přesahowacych projektach, kaž wo mobilnej telefonowej syći 5G a wo wutwarje železniskich zwiskow.

Serbska debata

Neuheiten LND