Naćisk zbudźa raznu kritiku
Danske knježerstwo planuje prědowanja w hinašich rěčach zakazać
Flensburg (SN/JaW). Danske knježerstwo planuje nowy zakoń, kotryž předewšěm mjez přisłušnikami tamnišeje němskeje mjeńšiny raznu kritiku zbudźa. Kaž němski mjeńšinowy dźenik Der Nordschleswiger – nowina je runja Serbskim Nowinam čłon Europskeho zjednoćenstwa dźenikow w mjeńšinowych a regionalnych rěčach (MIDAS) – tele dny rozprawja, chcedźa w kraju z tak mjenowanym zakonjom wo prědowanjach (Predigtengesetz) „nabožne prědowanja, wozjewjenja a narěče w hinašich rěčach hač w danšćinje zakazać“.
Serbja w 21. lětstotku
To a tamne (23.11.20)
Nic do Bayreutha, ale do Beiruta pósłał je Němski póst domjace dźěło studenta prawnistwa. Póst njemóže sej najebać intensiwne slědźenje rozkłasć, kak móžeše so to stać. Student bě dźěło 2. nowembra na pósće w Bayreuthu wotedał, zo bychu je uniwersiće města pósłali. Dokument pak su w Frankfurće „bohužel wopaki do Libanona dale posrědkowali“. Student bě dźěło dwójce wućišćał a je dokument mjeztym wosobinsce wotedał.
Z nanowym přezpólnym awtom w Gelsenkirchenje smalił je 15lětny. Policistam wóz napadny, jako bě ze 100 kilometrami na hodźinu město dowolenych 50 km/h w nutřkownym měsće po puću. Na signal k zastaću hólčec njereagowaše. Jědźechu tuž za nim a wuhladachu awto skónčnje před šulu stejace. Młodostneho, kiž so w kerku chowaše, přepodachu přiwołanemu nanej.
Nowy rekord infekcijow
Berlin (dpa/SN). Strowotniske zarjady Němskeje su Roberta Kochowemu institutej 23 648 dalšich koronainfekcijow w běhu 24 hodźin přizjewili. Tak bě dźensa rano nowy rekordny staw docpěty. Pjatk tydźenja běchu 23 542 nowonatyknjenjow zwěsćili. Wot spočatka pandemije je so po informacijach instituta 879 564 ludźi natyknyło. Ličba smjertnych padow w zwisku z wirusom je wo 260 na nětko 13 630 rozrostła.
Šćěpiwo hišće w decembru?
Berlin (dpa/SN). Zwjazkowa kanclerka Angela Merkel (CDU) liči z tym, zo serum přećiwo koronawirusej hišće w decembru abo „jara spěšnje w nowym lěće“ oficialnu dowolnosć w Europje dóstanje. „Potom započnjemy spěšnje šćěpić“, rjekny wona wčera wječor po widejowym wjeršku EU. Powěsće minjenych dnjow nastupajo šćěpiwo ma Merkel za „jara pozbudźace“. Prezidentka komisije EU Ursula von der Leyen ma přizwolenje lěka w druhej połojcy decembra za móžne.
Dobyće Bidena wobkrućene
Předsydaj Zelenych Annalena Baerbock (nalěwo) a Robert Habeck staj ...
Krajny sejm próstwu AfD wotpokazał
Drježdźany (dpa/SN). Sakski krajny sejm je wčera na wurjadnym posedźenju wo nowym zakonju za škit před infekcijemi debatował a w tym zwisku zapodatu próstwu frakcije AfD wotpokazał. AfD bě sej žadała, wot zwjazkoweho sejma srjedu schwaleny nowy zakoń wotpokazać. Po nimale dwě hodźinje trajacym wuradźowanju hłosowaše 38 zapósłancow za namjet AfD, 70 parlamentownikow bě přećiwo tomu. Jědnaće zapósłancow pobrachowaše.
Stronski a frakciski šef AfD Jörg Urban mjenowaše w swojej narěči nowy zakoń „wobmjezowanje zakładnych prawow“ pod płašćikom škitnych naprawow. Zakonje tajkeho historiskeho rozměra měli so dokładnje rozjimać, Urban podšmórny. To njeje so dotal stało.
Schäuble pruwuje konsekwency
Berlin (dpa/SN). Prezident zwjazkoweho sejma Wolfgang Schäuble (CDU) da po mylenjach přez wopytowarjow na kromje rozjimanja zakonja wo škiće před infekcijemi juristiske kročele přećiwo wobdźělenym pruwować. Wón je zarjadnistwo prosył, „wšitke prawniske móžnosće pruwować, přećiwo skućićelam postupować a přećiwo tym, kotřiž su jim zastup do domu sejma zmóžnili“.
Za čas debaty zapósłancow běchu wopytowarjo někotrych z nich na chódbach Reichstaga wobćežowali, filmowali a werbalnje ranili. Stało je so to mjez druhim ministrej za hospodarstwo Peterej Altmaierej (CDU) a nutřkownemu politikarjej FDP Konstantinej Kuhlej. Štyrjo wopytowarjo běchu na přeprošenje třoch zapósłancow AfD w twarjenju Reichstaga. Dźensa chcyše so sejm z podawkami zaběrać.
Podhladnaj dale na ćěkańcy
Berlin/Drježdźany (dpa/SN). Dwaj dnjej po zajeću třoch podhladnych wobdźělnikow spektakularneho rubježnistwa juwelow w Drježdźanskim Zelenym wjelbje dwaj dalšej podhladnaj přeco hišće ćěkataj. Policija „z wulkim wotmachom“ za 21lětnymaj dwójnikomaj pyta. Mjeztym je něhdźe 40 pokiwow wobydlerjow dóšło, po tym zo běchu we wusyłanju „XY .... njerozrisane“ ludźi wo pomoc prosyli.
Nawodnistwo policije je mjeztym přiznało, zo njeje so poradźiło wšitkich pjećoch runočasnje zajeć, kaž bě poprawom planowane. Njebě w kóždym padźe wotwidźeć, kak so wosoby zadźerža. Wotpowědnje „dynamisce“ so zasadźenje wuwiwaše, zamołwići nowinarjam zdźělichu. Při wulkoraciji z wjace hač 1 600 policistami běchu třoch podhladnych z arabskeje wulkoswójby zajeli. Dwaj móžeštaj ćeknyć.
Zastojnicy běchu wšitkich pjećoch wobkedźbowali a wotposkali. Do toho mějachu informacije, zo chcedźa podhladni ćeknyć. Njewuzamkuja tuž, zo běchu podhladni wo planowanym zasadźenju policija informowani, abo zo spěšnje pytnychu, što so wokoło nich stawa.
To a tamne (20.11.20)
Hač snano za nim pytaja, chcyše 21lětny wědźeć, jako so tele dny na policajskej straži w Bochumje přizjewi. Po krótkim naprašowanju móžachu zastojnicy wobkrućić, zo tomu tak je. Přećiwo njemu předleži wukaz zajeća. Padustwa a jězdźenja bjez jězbneho lisćika dla bě jeho sudnistwo k połdra lětu jastwa zasudźiło. Policija muža zaja, njewuzamkujo wšak, zo chcyše sej bjezdomny tepjenu jastwowu celu w zymskim času zawěsćić.
Jako rumpodichojo předrasćeni motorscy skupiny „Harley Davidson riding Santas“ chcedźa so lětsa najebać koronapandemiju zaso na puć podać a pjenježne dary zběrać. „Pojědźemy 6. decembra po 29 městach a gmejnach, wězo z hygienowym konceptom“, zdźěli rěčnik skupiny. Lětsa chcedźa za dźěćacy hospicny skutk zběrać. Jězbu na dnju swj. Mikławša přewjeduja wot lěta 2015.
Hilse nachwilnje zajaty
Berlin (dpa/SN). Na kromje wčerawšeje demonstracije přećiwo wobmjezowanjam koronapandemije dla je policija Budyskeho zapósłanca AfD Karstena Hilsu nachwilnje zajała. Kaž Hilse sam informuje, běchu jeho policisća narěčeli, dokelž je bjez nahubnika po puću był. Pisomny atest zapósłanca zastojnicy njeakceptowachu. Po werbalnym rozestajenju Hilsu skónčnje na zemju stłóčichu a sputachu jemu ruce. Policija wopodstatni to z „njekooperatiwnym zadźerženjom“ łužiskeho zapósłanca.
Nahubniki na parkowanišćach
Drježdźany (dpa/SN). Sakska je hladajo na dale trajacu koronapandemiju škitne naprawy přiwótřiła. Wot wčerawšeho dyrbja ludźo nahubniki tež na parkowanišćach předawarnjow, před šulemi a pěstowarnjemi wužiwać. W padźe njedodźerženja hrozy pokuta 60 eurow. To je ministerka za strowotnistwo Petra Köpping (SPD) po wutornym posedźenju krajneho knježerstwa zdźěliła. Wšitkim staršim ludźom Köpping radźi so njetrjebawšich jězbow wzdać.
Awstralscy wojacy jatych morili
