Budyšin (CRM/SN) Wo swojim dźěle, za­cho­wać pomniki serbskeho žiwjenja kaž tež twarstwa, staj wčera wječor stawiznar dr. Pětš Šurman a wjelelětny nazhonity facowc za pomnikoškit dr. Alfred Roggan přednošowałoj. Tež hdyž njeběše kruh zajimcow w Budyskim „Wjelbiku“ runjewon jara wobšěrny, běchu wuwjedźenja projektoweju wobdźěłarjow zajimawe a samo putace.

Zhromadnje z Choćebuskim měšćanskim zarjadnistwom je móžno, zo so něštož­kuli zanjechane znowa wotkryje a do pomjatka wobydlerstwa zwoła. Njejsu to jenož awtentiske swědki za serbstwo, kaž bibliske hrona jako najstarše pisomne swědki delnjoserbšćiny, kotrež běchu z druhich cyrkwjow do historiskeje Klóšterskeje (serbskeje) cyrkwje w centrumje města znosyli. Su to tež pozdźiše wudźěłki wuměłstwa, kotrež maja so stawiznisce prawje zarjadować.

Do wodoweje hrjebje skočiło je girafowe młodźo Nakuru při swojim prěnim zjawnym wustupje w Hamburgskej coologiskej zahrodźe. Šok w dźesać stopnjow zymnej wodźe drje wone tak spěšnje njepřewinje, rjekny jeho hladarka nowinarjam. Pjeć ludźi pomhaše girafu wuchować. Na zbožo njebě so wona zraniła.

Muku město přilubjenych smartphonow chcyše wobšudnik wobsedźerjej wob­choda za mobilne telefony w Hannoveru podsunyć. Za 38 pječa originalnje zapakowanych telefonow žadane 14 000 eurow bě mějićel wobchoda hižo přihotował, jako w poslednim wokomiku dwělowaše. Jebak hrabny pjenjezy a chcyše ćeknyć. Z pomocu wobchodoweho detektiwa pak jeho zadźeržachu. Přiwołana policija namaka w tyzkach jenož muku.

Ćěkancam pomhać

Lubnjow (dpa/SN/ch). Komuny nje­měli so při planowanju domow za požadarjow azyla ćišćej anonymnych hroženjow kłonić, měni jednaćel Braniborskeho měšćanskeho a gmejnskeho zwjazka Karl-Ludwig Böttcher. Do toho bě pad w Lubnjowskim wjesnym dźělu Dłopje (Kittlitz) njeměr wubudźił. We wsy z 137 wobydlerjemi ma so 130 ćěkancow zaměstnić. Lubnjowski měšćanosta Helmut Wenzel (njestronjan) bě tohodla hižo­ hrožace listy dóstał. Wjesny předstejićel Dłopjow Bernd Elsner je so swo­jeho zastojnstwa wzdał. Böttcher komunam a wokrjesam poruča kedźbować, hač so planowane dimensije zhromadneho kwartěra tež do wsy hodźa. Při- wšěm měło so rozmyslować, hač njeje derje, nowych wobydlerjow přiwzać.

Pašowar awtow dyrbi do jastwa