Katolikojo so planam ministra spřećiwjeja
Söder: Z nadbytkom milinu potuńšić
Žadaja sej wěstotu wuhla dla
Wjerškowe zetkanje w kanclerskim zarjedźe ke kóncej brunicy
Berlin (dpa/SN). Do dźensnišeho wjerška k cyłkownemu konceptej skónčenja zmilinjenja brunicy žadaja sej ministerscy prezidenća wěstotu za potrjechene kónčiny. Braniborski ministerski prezident Dietmar Woidke (SPD) wočakuje wot zwjazkoweho knježerstwa spěšne rozrisanja ze spušćomnymi wobzamknjenjemi. „Njewěstosć je to najhórše, štož móže so nam stać“, rjekny Woidke powěsćerni dpa. Saksko-anhaltski ministerski prezident Reiner Haseloff (CDU) chcył jasnosć nastupajo financowanje wot Zwjazka přilubjenych pomocnych miliardow eurow za strukturnu změnu. Sakski knježerstwowy šef Michael Kretschmer (CDU) chce kóncej zmilinjenja brunicy hakle přihłosować, budu-li přilubjenja Zwjazka spjelnjene.
Dosć temow w Berlinje
To a tamne (15.01.20)
Prědowanje do fitnesoweho studija wusyłała je cyrkwinska wosada mylnje něšto dnjow w sewjerorynsko-westfalskim Solingenje. Mikrofonaj duchowneho a sportoweho trenarja w susodnym studiju běštej na samsnu frekwencu nastajenej. Ludźo w studiju so tuž njemało dźiwachu, jako słyšachu přez wótřerěčaki dźěle prědowanja. Wosada je problem mjeztym rozrisała a frekwencu změniła.
120 kilometrow před policiju ćěkał je w Bayerskej 60lětny smalak z Berlina. Policisća chcychu jeho awto na awtodróze A 92 pola Mnichowskeho lětanišća kontrolować. Muž pak spyta ćeknyć. Při tym jědźeše zdźěla do wopačneho směra – a to ze 180 km/h. Pola Wörtha zrazy do policajskeho awta. Wón njeměješe žanu jězbnu dowolnosć, a awto njebě zawěsćene. Nimo toho předležeše wukaz zajeća přećiwo mužej.
Politikarjow njewobrónić
Berlin (dpa/SN). Předsydka CDU Annegret Kramp-Karrenbauer žada sej hladajo na přiběrace namócnosće přećiwo komunalnym politikarjam dosahacy škit stata za nich, jich wobrónjenje pak wotpokazuje. To rjekny wona nowinarjam. Pozadk je pad měšćanosty delnjorynskeho Kamp-Lintforta. Tón bě po wospjetnych hroženjach prawicarjow wo to prosył bróń nosyć směć. Nětko wón sudnisce skorži, dokelž běchu próstwu wotpokazali. „Politikarjow wobrónić njeje prawy puć“, Kramp-Karrenbauer wuzběhny.
Oceany tak ćopłe kaž nihdy
Peking (dpa/SN). Morja swěta su loni tak ćopłe byli kaž hišće nihdy. Nimo toho so wone přez změnu klimy spěšnišo woćopleja, warnuje skupina 14 fachowcow z jědnaće institutow wšelakich krajow. Minjeny lětdźesatk je najwyše temperatury oceanow po 1950tych lětach wunjesł, kaž přepytowarjo zwěsćeja. Wyše temperatury zawinuja pak tež wjedrowe ekstremy, kaž wichory a wulke zliwki.
Sćelu fachowcow do Irana
Wočakuja směrodajne rozsudy wuhla dla
Berlin (dpa/SN). Nastupajo skónčenje zmilinjenja brunicy móhł tutón tydźeń směrodajny być. Hižo dźensa chcychu so mějićeljo milinarnjow ze zwjazkowym knježerstwom zetkać a wo tym rěčeć, kak móhli jich za zawrjenje milinarnjow wotškódnić, kaž powěsćernja dpa z kruhow wobdźělnikow zhoni. Jutře, srjedu, ma so wjerškowe zetkanje ministerskich prezidentow wuhlowych krajow Sewjerorynsko-Westfalskeje, Sakskeje, Saksko-Anhaltskeje a Braniborskeje ze zwjazkowej kanclerku Angelu Merkel (CD) w kanclerskim zarjedźe w Berlinje wotměć.
Dotal njeje jasne, hač zwjazkowe knježerstwo hižo jutře naćisk zakonja wo kóncu zmilinjenja brunicy wobzamknje. W nim móhło rjadowane być, hdy milinarnje zawru. Wot zwjazkoweho knježerstwa zasadźena komisija bě před lětom rozprawu wo poněčimnym zawěranju milinarnjow hač do lěta 2038 předpołožiła. Zwjazkowe knježerstwo tehdy přilubi koncept přesadźić a wuhlowym kónčinam wjacore miliardy eurow přewostajić.
Hodźina wěrnosće
Tysac miliardow na dobro klimy
Strasbourg (dpa/SN). We wobłuku hoberskeho inwesticiskeho programa chce komisija EU hač do lěta 2030 bilion eurow do klimoweho přewróta w Europje inwestować, potajkim tysac miliardow. Dźensa chcyše komisija w Strasbourgu rozłožić, kak sej program předstaji. K namjetam słuša mjez druhim pomoc sto miliardow eurow za europske regiony, kotrež so z klimowej a energijowej změnu wosebje bědźa. To su w prěnim rjedźe wuhlowe kónčiny kaž Łužica abo Sewjerorynsko-Westfalska.
Prezidentka komisije EU Ursula von der Leyen bě w decembru tak mjenowany „green deal“ předstajiła, zo by Europa hač do lěta 2050 klimje napřećo neutralna była. Za to měła so fosilnych palnych maćiznow kaž wuhla, wolija a płuna wzdać.
Mjeztym je dźěłarnistwo hórnistwo, chemija a energija (IG BCE) zwjazkowe knježerstwo namołwiło, konkretnu strategiju za wutwar ekomiliny předpołožić. Hladajo na zawrjenje jadrowych a wuhlowych milinarnjow njezbywa wjace wjele chwile, rjekny předsyda dźěłarnistwa Michael Vassiliadis.
To a tamne (14.01.20)
Lětadło-knihownja steji wot najnowšeho w sobu najstrašnišej štwórći stolicy Mexika-města. Tamniše zarjadnistwo bě 20 lět staru wusłuženu Boeing 737 kupiło a přetwarić dało. Hłowny zaměr je, ludźom a wosebje dźěćom knihi a elektroniske medije zbližić a tak kriminalitu pomjeńšić. W lětadle maja nimo knihow tež e-booki, słuchoknihi a kompjutery. Internet na naměsće, hdźež Boeing 737 steji, móža darmotnje wužiwać.
29 lět bjez jězbneje dowolnosće z awtom jězdźił je muž w Radebergu. Wukopało je so to nětko po wobchadnym njezbožu. Přewulkeje spěšnosće dla bě muž z awtom z dróhi zajěł, do štoma prasnył a so snadnje zranił. Jězbnu dowolnosć wšak policistam pokazać njemóžeše, tu běchu jemu hižo 1991 jězdźenja pod wliwom alkohola dla wotewzali. Wo nowu so wón ženje prócował njebě.
