Žada sej wěstotne pasmo w Syriskej

Dienstag, 22. Oktober 2019 geschrieben von:

Berlin (dpa/SN). Němska zakitowanska ministerka Annegret Kramp-Karrenbauer (CDU) je sej žadała, na sewjeru Syriskeje podłu mjezy Turkowskeje mjezynarodnje dohladowane wěstotne pasmo zarjadować. Wotpowědny, ze zwjazkowej kanclerku Angelu Merkel (CDU) dorěčany namjet je Kramp-Karrenbauer wčera zapadnym zwjazkarjam předpołožiła. Na zetkanju čłonskich krajow NATO štwórtk a pjatk w Brüsselu chce swój nastork­ před­stajić a rozjimać dać, kaž wona připowědźi. Wo móžnym zasadźenju Zwjazkoweje wobory dyrbjał zwjazkowy sejm rozsudźić. Zaměr měł tež program za ciwilny nowonatwar być. Turkowska bě 9. oktobra na sewjeru Syriskeje wojersku ofensiwu přećiwo kurdiskej milicy zahajiła. Zakitowanski politikar SPD Fritz Felgentreu kritizuje, zo njeje Kramp-Karrenbauer swój namjet nastupajo wěstotne pasmo w Syriskej z SPD dorěčała.

Dźensa chcyštaj so ruski prezident Wladimir Putin a turkowski prezident Recep Tayyip Erdoğan w Sočiju zetkać a wo połoženju w Syriskej wuradźować.

Koaliciske jednanja zahajene

Dienstag, 22. Oktober 2019 geschrieben von:

CDU, SPD a Zeleni w Sakskej prěnje konkretne rozmołwy wjedli

Drježdźany (dpa/SN). Po puću do „Kenije“: CDU, SPD a Zeleni chcedźa w Sakskej zhromadnje knježić. Sydom tydźenjow po wólbach krajneho sejma su so strony wčera k prěnim koaliciskim jednanjam za tajki zwjazk třoch stron schadźowali. Ministerski prezident Michael Kretsch­mer (CDU) rěčeše wo „woprawdźe pozitiwnym signalu“. Zaměr je „wutworić knježerstwo, kotrež přichodne pjeć lět stabilnje a bjez njetrjebawšeje zwady krajej słuži“, wu­zběhny ministerski prezident po prěnich rozmołwach w Drježdźanach.

CDU, SPD a Zeleni běchu minjene tydźenje šansy za móžne zhromadne skutkowanje pruwowali. „Při tym smy pyt­nyli, zo je tež wosobinska dowěra data“, Michael Kretschmer podšmórny. Nětko dźe wo wobsahowje konkretne koaliciske zrěčenje, a tajke ma dokładnje rozjimane być. „Naš narok je sakska koalicija, kotraž so mudrje a zmužiće do dźěła da. Po dźensnišim dnju mam zaćišć, zo móže so to poradźić.“

NATO prawy gremij?

Dienstag, 22. Oktober 2019 geschrieben von:
Namjet němskeje zakitowanskeje minis­terki Annegret Kramp-Karrenbauer (CDU), w Syriskej mjezynarodnje dohladowane wěstotne pasmo zarjadować, je kedźbyhódne. Wšako so Němska tak po dołhim mjelčenju scyła słowa jima. Wothladane wot toho, hač je namjet z koaliciskim partnerom SPD a wonkownym ministerstwom dorěčany, wón ničo na tym njezměni, zo njeje wojerska ofensiwa Turkowskeje w Syriskej ničo druhe hač mjezynarodne prawo ranjaca agresija. Što by było, by-li syriske wójsko do južneje Turkowskeje zaćah­nyło? Nětko chcyła němska zakitowanska ministerka z druhimi krajemi NATO­ kaž tež z Ruskej a Turkowskej rěčeć. Njemóžu pak sej při najlěpšej woli před­stajić, zo ruski prezident Putin abo turkowski prezident Erdoğan namjet Němskeje chutnje bjerjetaj. Lěpje by było, před UNO raznje přećiwo turkowskej inwaziji wustupować. To by prawy gremij był – nic NATO. Marko Wjeńka

Warnuje před AfD

Dienstag, 22. Oktober 2019 geschrieben von:
Erfurt (dpa/SN). Něšto dnjow do wólbow krajneho sejma je Zwjazk hospodarstwa Durinskeje před tym warnował AfD wolić. Štóž woli stronu z Björnom Höcku na čole, kiž steji za rasizm a prawicarski ekstremizm, „dyrbjał wědźeć, zo tak mjenu Durinskeje zeškodźi“, zdźěla hłowny jednaćel zwjazka Stephan Fauth. Durinska trjeba swětej wotewrjenu klimu, štož so jeno z wotewrjenosću a tolerancu radźi, wón piše. W Durinskej wola njedźelu nowy krajny sejm. AfD móže so po naprašowanjach 20 do 24 procentow nadźijeć.

Tójšto pjenjez prawiznikam

Dienstag, 22. Oktober 2019 geschrieben von:

Berlin (dpa/SN). Němske zwjazkowe mini­sterstwa su minjene lěta na wšě 200 000 eurow za prawiznikow wudali, zo bychu naprašowanja žurnalistow wotwobarali. To wuchadźa z wotmołwy zwjazkoweho knježerstwa na naprašowanje frakcije Lěwicy w zwjazkowym sejmje. Wot wšitkich ministerstwow a institucijow, kotrež běchu wotpowědne ličby za lěta 2013 do 2018 zapodali, tři ministerstwa wosebje napadnu: Zwjazkowy zarjad za wustawoškit je 74 000 eurow – a tak najwjace – za juristiske wotwoba­ranje nowinarskich naprašowanjow wudał. Zwjazkowy zarjad za imobilijowe nadaw­ki płaćeše prawiznikam 49 000 a wobchadne ministerstwo 35 000 eurow. Wonkowne ministerstwo je prawi­znikam nimale 20 000 eurow płaćiło.

Zwjazk žurnalistow Němskeje (DJV) kritizuje, zo so telko pjenjez z dawkowych srědkow prawizniskim kenclijam płaći. „Je skandalozne, zo zwjazkowe institucije z hodźinskimi sadźbami hač do 380 eurow k zbohatnjenju prawiznikow přinošuja, zo bychu njepřijomne prašenja žurnalistow wotwobarali“, rjekny zwjazkowy předsyda DJV Frank Überall.

To a tamne (22.10.19)

Dienstag, 22. Oktober 2019 geschrieben von:

Nachribjetnik ze 14 000 eurami je předewzaćelka z Chiny w němskim spěšniku ICE ležo wostajiła – a dźakowano železnicarce zaso wróćo dóstała. We wačoku běchu dalše chinske pjenjezy a wjacore kreditne karty. 43lětna bě njedźelu z ćahom z Dortmunda do Würzburga jěła a na nachribjetnik zabyła. Na to informowaše policija železnicarku w ćahu, kotraž wačok nadeńdźe. Samsny wječor jón Chinjanka zaso měješe.

Chětro zwažliweho fota na luksusowej dowolowej łódźi wo sebi dla ma pasažěrka na čas žiwjenja zakazane z łódźu sobu jěć. Žona bě přez balkonowe wobhrodźenje swojeje kabiny zalězła, zo by z mobilnym telefonom „selfie“ zhotowiła. To bě „lochkomyslne a strašne“, zdźěla łódźernja Royal Caribbean. Pasažěr bě žonu při zwažliwym postupowanju wobkedźbował a wobsadku łódźe informował.

Ma zrozumjenje za frustraciju

Montag, 21. Oktober 2019 geschrieben von:

Freiburg (B/SN). Arcybiskop Freiburga Stephan Burger ma zrozumjenje za ža­danje, žónske na měšnicy wu­swjećić, njewidźi pak žanu móžnosć, cyrkwinskoprawniske předpisy změnić. Wón móže sej předstajić, zo „je frustrěrowace, hdyž je na zakładźe splaha přistup k tutomu powołanju zawrjeny“. Na wěcy samej njemóže arcybiskop ničo změnić, wón pak so za to zasadźuje, zo přińdźe wjace žónskich do nawjedowacych pozicijow.

Bamž dowola putnikowanja

Vatikan (B/SN). Bamž Franciskus dowola oficialne putniske jězby k marijanskemu hnadownemu městnu Medźugorje. Zdobom ma so tomu zadźěwać, zo so tole wułožuje jako připóznaće pozdatnych zjewjenjow, zdźěli Vatikan. Wo tutym městnje w Bosniskej-Hercegowinje bu prěni króć w lěće 1981 wo zjewjenjach rozprawjane. Hač do dźensnišeho so wizi­je wonych šěsć widźerjow dale po­srědkuja a mnozy putnicy su so hižo naka­zali. „Z Medźugorja wuchadźa wosebita hnada“, zdźěli Vatikan. Medźugorje je jedne z najwažnišich putniskich městnow swěta.

20 lět dušepastyr

Maas: Ofensiwa rani prawo

Montag, 21. Oktober 2019 geschrieben von:

Berlin (dpa/SN). Turkowska wojerska ofensiwa přećiwo Kurdam na sewjeru Syri­skeje njewotpowěduje po słowach němskeho wonkowneho ministra Heika Maasa mjezynarodnemu prawu. Hladajo na argumentaciju, zo ma Turkowska mje­zynarodne prawo na swojim boku, Maas rjekny: „Po wšěm, štož wěmy, a po wšěm, štož Turkowska sama jako prawniski zakład podawa, njemóžemy tomu wotpowědować.“ Zdobom wón Turkowsku warnowaše, zo móhła EU srědki we wobłuku zrěčenja wo ćěkancach blokować.

Chcedźa dźěło bilancować

Berlin (dpa/SN). Wodźacy zastupnicy koalicije CDU a SPD w Berlinje su so na ča­sowy plan dojednali, po kotrymž chcedźa bilancu prěnjeho połčasa wólbneje doby předpołožić. Pječa je plano­wane spočatk nowembra dotalne dźěło wuhódnoćić, powěsćernja dpa zdźěla, powołujo so na wobdźělnikow wčera­wšeho koaliciskeho wuběrka. Tak su so mjez druhim na to dojednali, zo maja dźěle noweho klimoweho zakonja hač do kónca lěta płaćiwosće nabyć.

Zaso demonstrowali

Najebać zakaz su wčera w centrumje chinskeje zarjadniskeje cony Hongkonga zaso dźesaćitysacy ludźi měrniwje přećiwo knježerstwu a přećiwo policajskej namocy demonstrowali, žadajo sej wotstup ministerskeje prezidentki Carrie Lam a swobodne wólby. Samsny čas dóńdźe w nakrom­nych dźělach Hongkonga k namócnosćam a zražkam z policiju. Foto: dpa/ Jörn Petring

Jednaja nětko wo koaliciji

Montag, 21. Oktober 2019 geschrieben von:
Drježdźany (dpa/SN). W sakskej krajnej stolicy zeńdźechu so dźensa dopołdnja CDU, SPD a Zeleni ke koaliciskim jednanjam, zo bychu zhromadne knježerstwo w Sakskej wutworili. Tajki zwjazk třoch stron w Sakskej dotal hišće njebě. Po po­litiskim přewróće bě CDU trójce za sobu sama knježić móhła. Po tym dyrbješe sej tři legislaturne doby móc pak z SPD pak z FDP dźělić. Tak mjenowany čorno-zeleny-čerwjeny keniaski zwjazk eksistuje dotal jenož w Saksko-Anhaltskej. Tež w Braniborskej aktualnje wo tajkim jednaja. W Sakskej běchu třo móžni partnerojo při sonděrowanjach hižo zhromadne zaměry formulowali, zdobom pak tež rozdźělne pozicije zwěsćili. Sakska unija bě při wólbach krajneho sejma 1. septembra z 32,1 procentom před AfD (27,5 procentow) jako najsylniša politiska móc wušła. Po tym přińdu Lěwica (10,4), Zeleni (8,6) a SPD (7,7). CDU bě hižo do wólbow koaliciju z AfD a Lěwicu kategorisce wuzamknyła.

Serbska debata

Neuheiten LND