Žiwe dopominanje

Montag, 19. August 2019 geschrieben von:

Młodźinske hibanje wobdźělnikow z pjeć krajow zjednoćiło

Zgorzelec (AK/SN). Žiwa kultura dopominanja započina so ze zetkanjom. Wona trjeba stajnje zaso intensiwnu diskusiju a rozestajenje ze stawiznami. Tole je so tež na lětušim 12. mjezynarodnym dnju młodźinskeho hibanja „Worcation“ w Zgorzelecu pokazało. Dwaj tydźenjej je dwaceći młodostnych z Němskeje, Pólskeje, Ukrainy, Italskeje a Francoskeje zhromadnje w bywšim lěhwje wójnskich jatych STALAG VIII A přebywało. Zarjadowanje organizowało bě towarstwo Meetingpoint Music Messiaen. Wone so hižo lěta za to zasdźa, stawizny lěhwa dale a dokładnišo wobdźěłać. Na ležownosći je dźensa mjezynarodny młodźinski a zetkawanski centrum zaměstnjeny.

Chaotiske postupowanje

Montag, 19. August 2019 geschrieben von:
Bych-li wšěch naličić dyrbjał, kotřiž so tuchwilu wo to prócuja SPD nawjedować směć, to drje bych chětro jakotać započał. Na wšě 14 wosobow je so dotal přizjewiło – pjeć porikow a jednotliwcy. Sym sej wěsty, zo tež socialdemokraća sami poněčim přehlad zhubja. Ći maja mjenujcy nowe nawodnistwo strony postajić, hač jako porik abo jednotliwca. A nětko je so tež hišće financny minister Olaf Scholz přizjewił. Po tym zo bě spočatnje wšitke ambicije na zastojnstwo prěł, je sej wěc nětko hinak přemyslił, po tym zo bě „połoženje znowa posudźował“, kaž sam rjekny. Njewěrju, zo so SPD z tajkim chaotiskim postupowanjom pod hesłom „kóždy smě so přizjewić“ z najćešeje krizy swojich sta­wiznow wudrapa. Doba přizjewjenja so 1. septembra skónči. Samsny dźeń drje budu wolerjo dožiwić dyrbjeć, kak je nahladnosć SPD w Sakskej a Braniborskej dale woteběrała. Tajku stronu nawjedować nikomu­ njezawidźu. Marko Wjeńka

To a tamne (19.08.19)

Montag, 19. August 2019 geschrieben von:

Tepjene špundowanje matej wot najnowšeho lawica Gina a jeje partner Navin w Kölnskim zwěrjencu. Na wšě 200 000 eurow je přetwar płaćił, kaž coo zdźěla. Porik móže so nětko rozsudźić: Pak wotpočuje na hórce před wočemi wopytowarjow, pak zminje so w nowej tepjenej prózdnjeńcy. Tež kwartěr tigrow chcedźa w Kölnje podobnje ponowić. Tigraj Sergan a Hanya dyrbitej nachwilnje do druheho zwěrjenca.

Spěšnje a tunjo nakupować chce wjetšina ludźi w Němskej. To je wuslědk naprašowanja slědźenskeho instituta Nielsen. Tak su 65 procentam přetrjebarjow potuńšene poskitki jara wažne. Nimale runje telko ludźi (59 procentow) najradšo tam nakupuje, hdźež maja swoju lisćinu najspěšnišo wotdźěłanu. Wěcywustojne poradźowanje ma jenož kóždy štwórty kupc za wažne.

„Wuhlo ma naraz mnohich přećelow“

Freitag, 16. August 2019 geschrieben von:

Měšćanosća a wjesnjanosća z třoch brunicowych rewěrow zetkachu so wčera prěni raz, zo bychu sej wo aktualnym stawje wotpohladaneje strukturneje změny po kóncu wudobywanja brunicy w lěće 2038 mysle wuměnjeli.

Grodk (JoS/SN). W komunach, městach a wokrjesach swědomiće za strukturnu změnu dźěłaja. Zwjazk pak nastupajo spěchowanje strukturnych srědkow tuchwilu ludźi a tak tež rewěry dosahajcy njezapřijima. Wuprajenja přitomnych měšćanostow z Łužicy, srjedźneje Němskeje a Porynskeje wčera w Grodku to potwjerdźichu.

Altmaier chce soli wotstronić

Freitag, 16. August 2019 geschrieben von:

Berlin (dpa/SN). Zwjazkowy hospodarski minister Peter Altmaier (CDU) je koncept wo wotstronjenju solidaritneho přino­ška předpołožił a tak zdobom přećiwny model k planam zwjazkoweho financ­neho ministra Olafa Scholza, kiž chce přinošk jeno dźělnje šmórnyć. Po słowach Scholza ma so mzda wobkedźbować. Čim wyša wona je, ćim wyši ma přinošk być. Altmaier namjetuje, tak mjenowany soli w třoch kročelach hač do lěta 2026 wotstronić, kaž je dźensa w Rańšim magacinje ZDF rozkładł.

Dźensa wo lisćinje rozsudźa

Lipsk (dpa/SN). Něhdźe dwaj tydźenjej do wólbow Sakskeho krajneho sejma chcyše wustawowe sudnistwo w Lipsku dźensa swój wusud hladajo na lisćinu kandidatow AfD wozjewić. Formalnych zmylkow dla bě wólbny wuběrk jenož 18 město 61 městnow přizwolił. Přede­wšěm pak je kritizował, zo bě AfD lisćinu na dwěmaj rozdźělnymaj stronskimaj zjězdomaj wobzamknyła a wólbne jednanje změniła. Tuž njemějachu wšitcy kandidaća samsnu šansu, wuběrk po­twjerdźi. AfD je přećiwo wusudej skoržiła.

Trump chce Grönland kupić

Telewizija ZDF je dźensa swój rańši magacin live z Choćebuskeho Stareho torhošća wu­sy­łała. Moderator sćelaka Andreas Wunn (nalěwo) rozmołwješe so z wobydle­rjemi kaž tež z bra­niborskim ministerskim prezidentom Dietmarom Woidku (SPD, naprawo) wo při­chodźe Łužicy. Do wusyłanja bě so Wunn dokładnje we Łužicy infor­mował a z wjacorymi ludźimi rěčał. W běhu krótkeho filma předstaji wón wšelake ideje, na přikład předstawy studentow Brani­borskeje techniskeje uniwersity Choćebuz-Zły Komorow wo perspektiwje za Łužicu. Foto: Michael Helbig

Rěčny duel wotměłoj

Freitag, 16. August 2019 geschrieben von:
Choćebuz (dpa/SN). Braniborski ministerski prezident Dietmar Woidke a kandidat CDU wo zastojnstwo Ingo Senft­leben zetkaštaj so wčera w Choćebuzu k direktnemu duelej, kotryž běchu regionalne hospodarske zwjazki organizowali. Wuwiće Łužicy bě hłowna tema disku­sije. Wobaj kritizowaštaj politiski stil AfD, kotraž je ze swojimi parolemi wulke ri­zi­ko za dalše hospodarske wuwiće kónčiny. Tohodla zhromadne dźěło z njej wotpokazujetaj. Woidke zasadźa so za Łužicu jako energijowy modelowy region. Dźensa chcyše wón wotpowědny dokument zastupjerjow kraja, hospodarstwa a slědźenja zwjazkowej wobswětowej ministerce Sveni Schulze (SPD) přepodać. Pozadk­ toho je, wutworić w Choćebuzu kompetencny centrum za škit klimy.

Ćeže podruže dla

Freitag, 16. August 2019 geschrieben von:
Berlin (dpa/SN). Stupace podruže a płaćizny imobilijow rjemjeslnistwu we wulkoměstach bědu načinjeja. „We wěstych měšćanskich dźělach zhubjeja so pje­karnje, rěznistwa, krawcownje abo šwal­čer­nje, dokelž njemóža hižo podruž za swo­je wobchody zapłaćić“, wuswětla gene­ralny sekretar centralneho rjemjeslniskeho zwjazka ZDH Holger Schwannecke w dźensnišim wudaću Stuttgarter Zeitung. W mnohich městach so zawody na kromu wróćo sćahnu, štož pak tam k hinašim konfliktam wjedźe. Centralny zwjazk zepěra so na informacije aktualneho naprašowanja mjez 5 000 zawodami. Nimale kóždy dźesaty chce w přichodnymaj lětomaj lět swoje stejnišćo změnić. W nutřkownych městach je to nimale kóždy pjaty rjemjeslniski zawod.

Žane njelěpšiny za wuchod

Freitag, 16. August 2019 geschrieben von:

Graal-Müritz (dpa/SN). Wuchodoněmske zwjazkowe kraje nimaja při spěchowanju přez Zwjazk žane njelěpšiny. Wo tym je społnomócnjeny zwjazkoweho knježerstwa za wuchod Christian Hirte (CDU) přeswědčeny. „30 lět po znowazjednoćenju Němskeje by wopak było při spěchowanju wšelake instrumenty wužiwać“, rjekny wón wčera w mecklenburgsko-předpomorskim Graal-Müritzu. W starych zwjazkowych krajach su kónčiny, kotrež maja sej wo wjele špatnišo hač něko­tre regiony w nowych krajach, Hirte zwurazni. Statistisce widźane njeje najchudša kónčina w Mecklenburgsko-Předpomorskej, hdźež su mzdy poměrnje niske, ale w sewjerorynsko-westfalskim Recklinghausenje.

Dźe wo to, zaměrnje hladać, hdźe je naj­wjetša potrjeba spěchowanja. „To chcemy přichodnje činić“, Christian Hirte podšmórny. Dźěłowa skupina za koordinaciju strukturneje změny je so nimale jednohłósnje na to dojednała. „Přiwšěm dóstanje wuchod dale wjace srědkow.“

„Dyrbimy přihotowani być“

Freitag, 16. August 2019 geschrieben von:

Pólska wita plany USA, dalšich wojakow na wuchod přepołožić

Waršawa (dpa/SN). Pólski wonkowny minister Jacek Czaputowicz je wot USA planowane přepołoženje w Europje zaměstnjenych ameriskich jednotkow do směra na wuchod zakitował. „Prezenca ameriskich jednotkow w Pólskej hraje jara­ wažnu wottrašacu rólu, wažnišu hač samsna prezenca wojakow dale na za­padźe“, wuzběhny Czaputowicz w rozmołwje z powěsćernju dpa. Wot planowaneho wopyta prezidenta USA Donalda Trumpa w Pólskej za dwaj tydźenjej wočakuje wón jasne konkretizowanje mjenowanych planow.

USA chcyli ličbu ameriskich wojakow w Pólskej wot tuchwilu 4 500 na 5 500 rozšěrić. Donald Trump bě pak připo­wědźił, zo nochcył přidatnych wojakow słać, ale tysac z nich we wobłuku Europy přesadźić. Jako móžny kraj, zwotkel móhli wojacy přińć, mjenowaše wón Němsku. „Rozsudźić dyrbja Američenjo sami“, rjekny Czaputowicz, kiž potwjerdźi, zo maja wojacy USA tež w Němskej wulku zamołwitosć. Zdobom pak na to pokaza, zo je jich ličba tam wo wjele wjetša.

Serbska debata

Neuheiten LND